Múgedektigi bar jáne asyraýshysynan aıyrylǵan qazaqstandyqtar 68 mlrd teńge aldy
ASTANA. KAZINFORM — Qazaqstandyqtarǵa 68 mlrd teńgeden astam somada múgedektigi jáne asyraýshysynan aıyrylý boıynsha járdemaqylar men áleýmettik tólemder tólendi, dep habarlaıdy Eńbekmıni baspasóz qyzmeti.
— Jyl basynan beri múgedektigi boıynsha jáne asyraýshysynan aıyrylý jaǵdaıy boıynsha memlekettik áleýmettik járdemaqylardy (budan ári — MÁJ) tóleýge respýblıkalyq bıýdjetten 59,3 mlrd teńge jumsaldy. Buǵan qosymsha Memlekettik áleýmettik saqtandyrý qorynan (budan ári — MÁSQ) eńbekke qabilettiliginen aıyrylý jáne asyraýshysynan aıyrylý boıynsha shamamen 8,9 mlrd teńge somasyna áleýmettik tólemder júzege asyryldy. 2026 jylǵy 1 aqpandaǵy jaǵdaı boıynsha múgedektigi boıynsha MÁJ alýshylar sany shamamen 545,9 myń adamdy, asyraýshysynan aıyrylý jaǵdaıy boıynsha — shamamen 191,9 myń adamdy qurady, — delingen taratylǵan aqparatta.
Múgedektigi boıynsha memlekettik áleýmettik járdemaqylardyń mólsheri múgedektiktiń tobyna jáne sebebine, sondaı-aq tıisti qarjy jylyna arnalǵan «Respýblıkalyq bıýdjet týraly» zańda belgilengen eń tómen kúnkóris deńgeıiniń shamasyna baılanysty bolady.
Asyraýshysynan aıyrylý jaǵdaıy boıynsha memlekettik áleýmettik járdemaqylardyń mólsheri qaıtys bolǵan asyraýshynyń asyraýyndaǵy adamdardyń sanyna, qaıtys bolý sebepterine jáne eń tómen kúnkóris deńgeıine baılanysty bolady.
Budan basqa, mindetti áleýmettik saqtandyrý júıesine qatysýshylarǵa áleýmettik táýekelder týyndaǵan jaǵdaıda MÁSQ-dan áleýmettik tólemder júzege asyrylady. 2026 jylǵy 1 aqpandaǵy jaǵdaı boıynsha 86,2 myń adam eńbek etý qabiletinen aıyrylý boıynsha áleýmettik tólem, al 62,9 myńǵa jýyq otbasy asyraýshysynan aıyrylý boıynsha áleýmettik tólem aldy.
Tólemderdiń mólsheri sońǵy 2 jyldaǵy MÁSQ-ǵa áleýmettik aýdarymdar júrgizilgen ortasha aılyq tabys, eńbekke qabilettiliginen aıyrylý koeffıtsıentteri, asyraýyndaǵy adamdar sany, mindetti áleýmettik saqtandyrý júıesine qatysý ótili jáne tabysty aýystyrý derekterine baılanysty, ár adamǵa jeke taǵaıyndalady.
Bul tólemder respýblıkalyq bıýdjetten tólenetin uqsas járdemaqylarǵa qosymsha júzege asyrylady.
Múgedektigi boıynsha jáne asyraýshysynan aıyrylý jaǵdaıy boıynsha memlekettik áleýmettik járdemaqylardyń mólsheri 2026 jylǵy 1 aqpanan bastap eń tómen kúnkóris deńgeıiniń ulǵaıýyna baılanysty 10%-ǵa ósti. QR Úkimetiniń sheshimi boıynsha eńbekke qabilettiliginen aıyrylý jáne asyraýshysynan aıyrylý boıynsha MÁSQ-dan tólenetin tólemderdiń mólsheri de 10%-ǵa artty.
Osylaısha, osy jyly jalpy aýrýdan múgedektigi boıynsha MÁJ mólsheri 1-top úshin — 111 873 teńgeni, 2-top úshin — 89 498 teńgeni, 3-top úshin — 61 022 teńgeni quraıdy.
2026 jylǵy 1 aqpandaǵy jaǵdaı boıynsha eńbekke qabilettiliginen aıyrylý boıynsha áleýmettik tólemderdiń ortasha mólsheri 54 742 teńgeni, asyraýshysynan aıyrylý boıynsha — 55 800 teńgeni quraıdy.
Osydan buryn jyl basynan beri múgedektikti belgileýge qatysty 9 myńnan astam ótinim syrttaı formatta qaralǵanyn jazǵanbyz.