Múgedektigi bar jandarǵa turǵyn úı alýda memleket qandaı kómek kórsetýde
ASTANA. KAZINFORM — Múgedektigi bar azamattarǵa 423 jáne múgedektigi bar balalardy tárbıelep otyrǵan otbasylarǵa 305 turǵyn úı sertıfıkaty berildi. Bul týraly Úkimet otyrysynda Ónerkásip jáne qurylys vıtse-mınıstri Qýandyq Qajkenov málimdedi.
«Búgingi kúni elimizde 56 myń birinshi jáne ekinshi toptaǵy múgedektigi bar adam jáne 25 myń múgedek bala tárbıelep otyrǵan otbasy turǵyn úı kezeginde tur. Olardy turǵyn úımen qamtamasyz etý maqsatynda mınıstrlik memlekettik qoldaýdyń birneshe tetigin iske asyrýda. Jeńildetilgen ıpotekalyq qaryzdar boıynsha bastapqy jarnanyń bir bóligin óteý úshin azamattarǵa turǵyn úı sertıfıkattary beriledi. Olardyń maksımaldy somasy — 1,5 mln teńge. 1-shi jáne 2-shi toptaǵy múgedektigi bar azamattarǵa 474,8 mln teńgeden astam somaǵa 423 sertıfıkat jáne múgedektigi bar balalardy tárbıelep otyrǵan otbasylarǵa jalpy somasy shamamen 344,1 mln teńgege 305 sertıfıkat berildi», — dedi Qýandyq Qajkenov.
Vıtse-mınıstrdiń aıtýynsha, bul tetik jergilikti bıýdjet esebinen iske asyrylýda.
Sondaı-aq, vedomstvo ókili 2022 jyldan bastap Memleket basshysynyń tapsyrmasy boıynsha kezekte turǵan azamattardyń keıbir sanattaryna, onyń ishinde birinshi jáne ekinshi toptaǵy múgedektigi bar adamdardyń jáne múgedek balalardy tárbıelep otyrǵan otbasylardyń jeke sektordaǵy turǵyn úıdi jaldaý qunynyń bir bóligi sýbsıdııalanyp kele jatqanyn atap ótti.
«Búgingi tańda 9 955 otbasy tólem alady, onyń ishinde birinshi jáne ekinshi toptaǵy 854 múgedektigi bar azamat bar jáne 703 múgedek bala tárbıelep otyrǵan otbasy bar», — dedi spıker.
Buǵan deıin Úkimet otyrysynda elimizde 203 myń múmkindigi shekteýli bala tirkelgeni habarlandy.
Sonymen qatar, múmkindigi shekteýli balalar úshin mektepte «jeke kómekshi» laýazymy engiziletini aıtyldy.
