Múgedektigi bar jandardy jumysqa ornalastyrý tártibi qandaı
Múgedektigi bar jandarǵa arnaıy jumys ornyn jabdyqtaý shyǵyndaryn memleket sýbsıdııalaıdy. QR Eńbek jáne áleýmettik qorǵaý mınıstrligi múgedektigi bar jandardy jumysqa ornalastyrý sharalary qalaı júrip jatqanyn aıtyp berdi, dep habarlaıdy QazAqparat tilshisi.
Áleýmettik kodekske sáıkes, jergilikti atqarýshy organdar aýyr jumystaǵy, eńbek jaǵdaıy zııandy, qaýipti jumys oryndaryn esepke almaǵanda, múgedektigi bar adamdar úshin jumys oryndarynyń 2-4%-yna deıin jumys oryndaryna kvota belgileıdi.
Osylaısha, ótken jyly 12,2 myń adam kvota sheńberinde jumysqa ornalastyrylǵan. 2023 jyldyń 2 toqsanynda 7,9 myń adam jumysqa kirgen.
«Oǵan qosa, arnaıy jumys ornyn jabdyqtaýǵa baılanysty jumys berýshilerdiń shyǵyndaryn sýbsıdııalaý qarastyrylǵan. 2018 jyldan bastap halyqaralyq tájirıbeni eskerip, múgedektigi bar jandardy jumysqa ornalastyrý úshin arnaıy jumys ornyn jabdyqtaýǵa baılanysty jumys berýshiler shyǵynyn sýbsıdııalaý tártibi engizildi. Sýbsıdııa jumys berýshilerge arnaıy jumys oryndaryn jaraqtandyrý úshin jabdyq satyp alýǵa, montajdaýǵa jáne ornatýǵa jumsalǵan shyǵyndy óteý maqsatynda beriledi», - dep jaýap berdi mınıstrlik agenttiktiń resmı saýalyna.
2022 jyly múgedektigi bar adamdar úshin 55 arnaıy jumys orny qurylǵan (kórý qabileti buzylǵan 20 adam, estý qabileti buzylǵan 22 adam jáne tirek-qozǵalys apparaty buzylǵan 13 adam). Búgingi tańda múgedektigi bar adamdar úshin 18 arnaıy jumys orny quryldy.
«Jumyspen qamtýǵa járdemdesý sharalary turaqty negizde jetildiriledi. Máselen, bul mehanızm 2022 jyldyń sońynda qaıta qaraldy. Bıyldan bastap jumys berýshilerdiń shyǵyndary bekitilgen jáne de 300 AEK-ke deıin (1 mln teńge) óteledi. Bul sharaǵa 2023 jyly 207 adamǵa 214,2 mln teńge qarastyrylǵan», - deıdi Eńbek mınıstrligi.
Sonymen qatar jabdyqtalǵan arnaıy jumys oryndaryna alynatyn múgedektegi bar adamdardyń jalaqysy úsh jyl ishinde sýbsıdııalanady: birinshi jyly jalaqynyń 70% memleket, 30% - jumys berýshi sýbsıdııalaıdy; ekinshi jyly 65% memleket, 35% - jumys berýshi; úshinshi jyl 60% memleket, 40% - jumys berýshi óteıdi. 2023 jylǵa jalaqyny sýbsıdııalaýǵa 90 mln teńge qarastyrylǵan.
Jumyspen qamtýǵa járdemdesý sharalary Kásipkerlikti damytý ulttyq jobasynda da qarastyrylǵan.
Onda jumys izdep júrgen adamdar, jumyssyzdar jáne azamattardyń jekelegen sanattary, onyń ishinde múgedektigi barlar, eńbek naryǵynda suranysqa ıe mamandyqtar men biliktilikter boıynsha qysqa merzimdi oqytý kýrstarynan, «Elektrondy eńbek bırjasy» bazasynda (skills.enbek.kz) onlaın oqytýdan ótýge, bıznes-ıdeıalardy iske asyrý úshin óteýsiz grant alýǵa, «Jastar praktıkasy», «Alǵashqy jumys orny», «Kúmis jas» jáne «Urpaqtar kelisimsharty» jobalaryna qatysýǵa múmkindik bar.
Sondaı-aq, 2023 jyldan bastap bıznesti damytýǵa arnalǵan 400 AEK-ke deıingi granttar ataýly áleýmettik kómek, kóp balaly jáne onyń jubaıy boıynsha járdemaqy, asyraýshysynan aırylý boıynsha áleýmettik járdemaqy alýshylarǵa, qonys aýdarýshylarǵa, qandastarǵa, eńbekke qarsy kórsetilimderi bar, múgedek balany jáne onyń jubaıyn tárbıelep otyrǵan múgedektigi barlarǵa, halyqtyń áleýmettik osal toptaryna jatatyn adamdarǵa beriledi.
1 qyrkúıektegi jaǵdaı boıynsha ulttyq jobaǵa qatysýǵa 34 316 adam ótinish bildirip, jumyspen qamtýǵa járdemdesý sharalarymen 24 866 múgedektigi bar adam qamtylǵan.
Buǵan deıin Eńbek jáne halyqty áleýmettik qorǵaý mınıstrligi eldegi múgedektigi bar jandarǵa qandaı qoldaý sharalary qarastyrylǵanyn aıtqan edi.
