Múgedektigi bar jandardy baspanamen qamtamasyz etý talaptary qandaı
ASTANA. KAZINFORM – Búgin Úkimet otyrysynda ınklıýzıvti saıasatty júzege asyrý sharalaryn talqylaý kezinde Ónerkásip jáne qurylys vıtse-mınıstri Qýandyq Qajkenov baspanamen qamtamasyz etý tetikterin túsindirdi.
- Mınıstrlik múmkindigi shekteýli adamdardyń ómir sapasyn jaqsartý maqsatynda barlyq nysan men qyzmetterge qoljetimdilikti qamtamasyz etý boıynsha turaqty jumys júrgizip keledi. Adam ómir súretin orta, ıaǵnı ómiri men qozǵalysyna qatysty barlyq jaǵdaı yńǵaıly ári kedergisiz bolýy kerek. Jańa qabyldanǵan Qurylys kodeksinde bul talaptar kúsheıtildi. Endi qolaıly orta barlyq kezeńde: qalany josparlaý, jobalaý, qurylys barysynda jáne nysandy paıdalanýǵa berý kezinde qarastyrylady. Osylaısha, qoljetimdilik talaptary jobalaý kezeńinen bastap eskerilip, qurylys kezinde mindetti túrde saqtalady. Budan bólek, nysandy paıdalanýǵa berý kezde áleýmettik qorǵaý organdary qatysyp, onyń múmkindigi shekteýli adamdarǵa qanshalyqty yńǵaıly ekenin tekseredi, - dedi Q.Qajkenov.
Onyń sózine qaraǵanda, salalyq normatıvtik qujattarǵa qosymsha talaptar engizildi. Atap aıtqanda:
- turǵyn úıdi qaıta josparlaý tártibi jeńildetildi (kórshilerdiń kelisimi qajet emes);
- jobalyq qujattamada qoljetimdilikke arnalǵan bólek bólim qarastyryldy;
- bıýdjet esebinen salynatyn turǵyn úılerde páterlerdiń keminde 5% múmkindigi shekteýli adamdarǵa beıimdelip salynýy qajet
- Sonymen qatar Úkimet tarapynan múmkindigi shekteýli adamdardy baspanamen qamtamasyz etý sharalary iske asyrylyp keledi. Qazirde baspana kezeginde I jáne II toptaǵy 63 myńnan astam adam jáne múmkindigi shekteýli bala tárbıelep otyrǵan shamamen 26 myń otbasy tur, - dedi vıtse-mınıstr.
Atalǵan áleýmettik toptyń turǵyn úı máselesin sheshý úshin memlekettik qoldaýdyń birqatar tetikteri qoldanylady, olarǵa:
1) kommýnaldyq turǵyn úı qorynan baspana berý;
2) jeńildetilgen ıpotekalyq qaryz berý;
3) jeke sektordan turǵyn úı jalǵa alý aqysynyń bir bóligin sýbsıdııalaý;
4) ıpotekalyq qaryzdar boıynsha bastapqy jarnany jabýǵa turǵyn úı sertıfıkattaryn berý jatady.
- Ótken jyldyń qorytyndysy boıynsha 7 893 adam arendelyq turǵyn úımen qamtamasyz etildi. Onyń ishinde 1 036-sy – I jáne II toptaǵy megedektigi bar adamdar, al 469-y – múmkindigi shekteýli bala tárbıelep otyrǵan otbasylar. Bıyl birinshi toqsannyń qorytyndysy boıynsha 810 múgedektigi bar jan jáne 843 otbasy arendalyq úı aldy. Sondaı–aq, turǵyn úı reformasy aıasynda jaldamaly úılerdi jekeshelendirýge ruqsat berildi. Sonyń nátıjesinde byltyr 4 386 múmkindigi shekteýli adam ózderi turyp jatqan kommýnaldyq úıdi jeke menshikke aldy, - dedi ol.
Munymen qosa, kezekte turǵan azamattar «Otbasy bank» arqyly 2 jáne 5 % jeńildetilgen ıpoteka ala alady. Byltyr osy baǵdarlama arqyly 5 277 adam úı satyp aldy. Onyń ishinde 381 nesıe múmkindigi shekteýli adamdarǵa, al 424 nesıe osyndaı bala tárbıelep otyrǵan otbasylarǵa berildi. Osy jyly barlyǵy 12 736 jeńildetilgen nesıe berý josparlanyp otyr.
Budan bólek, jergilikti bıýdjet esebinen bastapqy jarnanyń bir bóligin jabý úshin turǵyn úı sertıfıkattary beriledi. Ótken jyly 2 mlrd teńgege 1 733 sertıfıkat berildi. Onyń 334-ti I jáne II toptaǵy múgedektigi bar adamdarǵa, al 261 sertıfıkat múmkindigi shekteýli bala tárbıelep otyrǵan otbasylarǵa berildi.
- Sondaı-aq, Memleket basshysynyń tapsyrmasyna sáıkes, kezekte turǵan azamattardyń jekelegen sanattary úshin turǵyn úı qorynan baspanagy jalǵa alýǵa tólenetin aqynyń bir bóligi sýbsıdııalanady. Qazir 10 344 otbasy osyndaı kómek alyp otyr. Onyń ishinde I jáne II toptaǵy múgedektigi bar 870 adam jáne osyndaı bala tárbıelep otyrǵan 698 otbasy sýbsıdııa alady, - dedi vıtse-mınıstr.
Budan buryn habarlanǵandaı, bıyl ınklıýzıvti jumyspen qamtý múmkindigi keńeıtiledi.
