Múgedektigi bar jandar jeke kómekshiniń qyzmetin qalaı ala alady
ASTANA. KAZINFORM — Jyl basynan beri áleýmettik qyzmetter portaly arqyly shamamen 110,9 myń múgedektigi bar adam ońaltýdyń tehnıkalyq quraldaryn, 6,4 myń — ymdaý tili qyzmetin, 24,1 myń — jeke kómekshiniń, 3,8 myń — sanatorlyq-kýrorttyq emdeý qyzmetin aldy.
Portal múgedektigi bar adamdarǵa ońaltýdyń tehnıkalyq quraldary men qyzmetterin óndirýshini jáne jetkizýshini óz betinshe tańdaýǵa múmkindik beredi.
Kómek túrine tapsyrys berý kórsetiletin qyzmetti alýshynyń elektrondyq tsıfrlyq qoltańbasymen rastaý arqyly júzege asady.
Tapsyrys berilgen ońaltýdyń tehnıkalyq quraldaryn jetkizý nemese óz betinshe áketý arqyly alýǵa bolady.
Múgedektigi bar adamdardy ońaltý quraldarymen qamtamasyz etý protezdik-ortopedııalyq, sýrdotehnıkalyq, tıflotehnıkalyq jáne gıgıenalyq quraldar, sondaı-aq kreslo-arba berýdi qamtıdy.
Búgingi kúni portalda 885 arnaýly áleýmettik qyzmetter kórsetetin ortalyq (bólimsheler), 658 OTQ jetkizýshi, 29 myńǵa jýyq jeke kómekshi, 734 ymdaý tili jáne 112 sanatorlyq-kýrorttyq emdeý qyzmetterin usynýshy tirkelgen.
«Áleýmettik qyzmetter portaly» avtomattandyrylǵan aqparattyq júıesin engizý múgedektigi bar adamdardyń quqyǵyn qamtamasyz etý jáne ómir súrý sapasyn jaqsartý jónindegi ulttyq jospar sheńberinde qarastyrylǵan.
Jergilikti atqarýshy organdar janynan qurylǵan portal jónindegi komıssııaǵa jańa ókilettikter berilgen:
- múgedektigi bar adamdardyń sapasyz taýar nemese qyzmet týraly ótinishin 5 kún ishinde qabyldaý jáne qaraý;
- ónim berýshige hat joldaý jáne onyń oryndalýyn baqylaý;
- ónim berýshini portaldan shyǵarý jáne josyqsyz ónim berýshiler tizimine engizý týraly sheshim qabyldaý.
Portaldy paıdalaný boıynsha konsýltatsııany baılanys ortalyǵynan, ıaǵnı 1414 biryńǵaı nómiri arqyly alýǵa bolady.
