Múgedektigi bar azamattarǵa jumys pen kásip ashýǵa qandaı qoldaý bar
ASTANA. KAZINFORM — Memlekettiń qoldaýymen 10 myńnan astam múgedektigi bar qazaqstandyq jumyspen qamtyldy, dep habarlaıdy Eńbek jáne halyqty áleýmettik qorǵaý mınıstrliginiń baspasóz qyzmeti.
Múgedektigi bar 10,8 myń adam jumysqa ornalasty
Qazaqstanda múgedektigi bar adamdardy jumyspen qamtýǵa qoldaý kórsetý jalǵasyp jatyr. Jyl basynan beri memleket usynǵan jumyspen qamtý sharalarynyń kómegimen 10,8 myń adam jumysqa ornalasqan.
2026 jyldyń 1 qazandaǵy málimet boıynsha, jumysqa ornalasýǵa kómek surap, mansap ortalyqtaryna 29,5 myń múgedektigi bar azamat júgingen. Olardyń 18,2 myńy jumyspen qamtýǵa baǵyttalǵan belsendi sharalarǵa qatysqan.
— Nátıjesinde 10,8 myń adam jumysqa ornalasty. Onyń 5,1 myńy turaqty jumys tapsa, 5,4 myńy memleket sýbsıdııalaıtyn jumys oryndaryna ornalasqan. Atap aıtqanda, 4 264 adam qoǵamdyq jumystarǵa, 367 adam áleýmettik jumys oryndaryna, 495 adam «Jastar praktıkasy» baǵdarlamasyna, al 499 adam «Kúmis jas» jobasyna qatysý arqyly jumysqa ornalasqan, — delingen vedomstvo keltirgen derekte.
Múgedektigi bar azamattardy jumyspen qamtýdy qoldaýdyń negizgi tetikteriniń biri jumys oryndaryna kvota belgileý. Áleýmettik kodekske sáıkes, 50 jáne odan da kóp adam jumys isteıtin uıymdarǵa qyzmetkerlerdiń jalpy sanynyń 2-4 paıyzy kóleminde kvota belgilenedi. Bul rette aýyr, zııandy jáne qaýipti eńbek jaǵdaılary bar jumys oryndary esepke alynbaıdy.
2026 jyly múgedektigi bar 16 706 adamdy jumysqa ornalastyrýǵa arnalǵan kvota belgilendi. Bıylǵy ekinshi toqsannyń qorytyndysy boıynsha osy kvota aıasynda elimizde shamamen 6,2 myń adam jumysqa ornalasqan.
Salystyrý úshin aıtsaq, 2025 jyly belgilengen 16 719 jumys ornynyń 8,1 myńy qamtylyp, kvota boıynsha jumysqa ornalastyrý kórsetkishi 48 paıyzdy qurady.
Arnaıy jumys oryndary ashylyp, jalaqyny sýbsıdııalaý jalǵasyp jatyr
Sonymen qatar ár adamnyń jeke qajettiligine saı arnaıy jumys oryndaryn ashýǵa kóńil bólinip otyr. 2026 jylǵy 1 qazandaǵy jaǵdaı boıynsha osyndaı 47 jumys orny ashylǵan. Onyń 25-i estý qabileti buzylǵan adamdarǵa, 12-si kórý qabileti buzylǵan azamattarǵa, taǵy 10-y tirek-qımyl apparaty buzylǵan adamdarǵa arnalǵan.
Arnaıy jumys oryndaryn ashqan jumys berýshilerge de memleket qoldaý kórsetedi. Atap aıtqanda, jumysqa ornalasqan múgedektigi bar azamattardyń jalaqysyn sýbsıdııalaý qarastyrylǵan. 2026 jylǵy 1 qazandaǵy málimet boıynsha, mundaı sýbsıdııa 235 qyzmetkerge tólengen. Onyń 19-y 2026 jyly, 105-i 2025 jyly, 111-i 2024 jyly jumysqa ornalasqan.
Budan bólek, memleket múgedektigi bar azamattarǵa jańa mamandyq meńgerýge jáne óz kásibin ashýǵa da kómektesedi.
Múgedektigi bar azamattarǵa kásiptik oqý men granttar usynylady
Jyl basynan beri 243 adam qysqa merzimdi kásiptik oqýdan ótti.
«Bastaý Bıznes» jobasy aıasynda 3 639 adam kásipkerlik negizderin úırendi. Olardyń 2 375-i tıisti sertıfıkat aldy. Sonymen qatar 2 951 adam onlaın oqýǵa qatysyp, onyń 2 265-i oqýyn sátti aıaqtap, sertıfıkatqa ıe boldy.
Al 2026 jylǵy 1 qyrkúıektegi jaǵdaı boıynsha 578 múgedektigi bar azamat jańa bıznes-ıdeıalaryn júzege asyrý úshin memlekettik grant aldy. Bul qoldaý azamattarǵa óz isin ashyp, kásipkerlik qabiletin damytýǵa múmkindik beredi.
— Jalpy, Qazaqstanda múgedektigi bar adamdardy jumyspen qamtý úshin birneshe qoldaý tetigi qarastyrylǵan. Olardyń qatarynda mansap ortalyqtary arqyly jumys izdeý, kvota boıynsha jumysqa ornalasý, arnaıy jumys oryndaryn ashý, kásiptik oqytý, jalaqyny sýbsıdııalaý, qaıtarymsyz granttar berý jáne jastarǵa mıkrokredıt usyný bar. Sonymen birge azamattar jumys izdep, óz betinshe de jumysqa ornalasa alady, — dep túıindedi mınıstrlik.
Buǵan deıin múgedektigi bar adamdardyń quqyǵy buzylsa, qaıda shaǵymdanýǵa bolatynyn jazdyq.
