Múgedektigi bar azamattarǵa qandaı tólemder qarastyrylǵan
ASTANA. KAZINFORM — Qazaqstanda múgedektigi bar azamattarǵa birneshe baǵyt boıynsha áleýmettik qoldaý kórsetiledi. Olarǵa memlekettik járdemaqy, áleýmettik jáne saqtandyrý tólemderi, sondaı-aq kútim jasaıtyn adamdarǵa arnalǵan járdemaqy kiredi. Bul týraly Eńbek jáne halyqty áleýmettik qorǵaý mınıstrligi málim etti.
Qazaqstanda múgedektigi bar azamattardy áleýmettik qoldaýdyń kópdeńgeıli júıesi qalyptasqan. Ol memlekettik áleýmettik járdemaqylardy, Memlekettik áleýmettik saqtandyrý qorynan tólenetin áleýmettik tólemderdi, sondaı-aq eńbek jaraqaty nemese kásiptik aýrý saldarynan múgedektik belgilengen jaǵdaıda beriletin saqtandyrý tólemderin qamtıdy.
Búginde múgedektik boıynsha memlekettik áleýmettik járdemaqyny 544 myńnan astam adam alady. Aqshalaı qoldaýdyń negizgi túri — memlekettik áleýmettik járdemaqy. Onyń mólsheri belgilengen múgedektik toby men múgedektiktiń sebebine qaraı aıqyndalady.
2026 jyly jalpy aýrý saldarynan múgedektik belgilengen jaǵdaıda I toptaǵy múgedektigi bar azamattarǵa — 111 873 teńge, II topqa — 89 498 teńge, III topqa 61 022 teńge mólsherinde járdemaqy tólenedi.
Eger azamat úshin Memlekettik áleýmettik saqtandyrý qoryna áleýmettik aýdarymdar júrgizilgen bolsa, oǵan eńbekke qabilettiliginen aıyrylýyna baılanysty áleýmettik tólem de qosymsha taǵaıyndalýy múmkin. Onyń mólsheri áleýmettik aýdarymdar júrgizilgen tabys kólemine, jalpy eńbekke qabilettilikten aıyrylý dárejesine jáne mindetti áleýmettik saqtandyrý júıesine qatysý ótiline qaraı jeke esepteledi.
— Eńbek qyzmetine baılanysty jazataıym oqıǵa nemese kásiptik aýrý saldarynan múgedektikke ushyraǵan jumysshylar úshin saqtandyrý tólemderi kózdelgen. Osylaısha, azamattyń ómirlik jaǵdaıyna qaraı memlekettik jáne saqtandyrý júıesi arqyly kórsetiletin qoldaý sharalary birin-biri tolyqtyrýy múmkin, — delingen habarlamada.
I toptaǵy múgedektigi bar azamatqa kútim jasaıtyn adamdarǵa, sondaı-aq múgedektigi bar balany tárbıelep otyrǵan anasyna, ákesine, asyrap alýshysyna, qamqorshysyna nemese qorǵanshysyna da jeke qoldaý sharalary qarastyrylǵan. 2026 jyly tıisti aı saıynǵy memlekettik járdemaqynyń mólsheri 81 871 teńgeni quraıdy.
Múgedektik boıynsha tólemderdi «Azamattarǵa arnalǵan úkimet» memlekettik korporatsııasy arqyly, eGov.kz portalynda nemese proaktıvti formatta rásimdeýge bolady. Múgedektik belgilengennen keıin azamatqa járdemaqyny rásimdeý týraly usynys kórsetilgen SMS-habarlama jiberiledi. Tólemdi taǵaıyndaý úshin jaýap retinde kelisimin rastaý jetkilikti.
Qajetti málimetterdiń basym bóligin júıe memlekettik aqparattyq júıelerden avtomatty túrde alady. Bul suratylatyn qujattar sanyn azaıtyp, birqatar jaǵdaıda azamattyń ózi júginbeı-aq tólemdi taǵaıyndaýǵa múmkindik beredi.
Aıta keteıik, buǵan deıin múgedektikti anyqtaý kezinde qandaı qujattardy qaıta tapsyrýdyń qajeti joq ekenin jazdyq.
