Múgedektigi bar azamattarǵa arnalǵan tehnıkalyq quraldardy paıdalaný tártibi jańarady
ASTANA. KAZINFORM – Qazaqstanda múgedektigi bar jandardy ońaltýdyń tehnıkalyq quraldarynyń jekelegen túrlerimen tegin qamtamasyz etýdiń jańa tetigi engiziledi.
Atalǵan pılottyq joba Aqtóbe, Qaraǵandy jáne Pavlodar oblystarynda júzege asyrylady.
Joba 2030 jylǵa deıingi ınklıýzıvti saıasat tujyrymdamasy aıasynda ázirlenip, qoldaý júıesin meıilinshe tıimdi ári qoljetimdi etýge baǵyttalǵan.
Qazirgi ýaqytta ońaltýdyń tehnıkalyq quraldarymen qamtamasyz etý olardy aýystyrý merzimderin eskere otyryp, qaıtarymsyz negizde júzege asyrylady.
Alaıda quraldardy aýystyrý kezinde olardyń tehnıkalyq jaı-kúıi men tozý deńgeıi eskerilmeıdi, al paıdalaný kezeńinde jóndeý jumystary qarastyrylmaǵan.
Jańa tetik qalaı jumys isteıdi?
Pılottyq joba aıasynda ońaltýǵa arnalǵan keıbir tehnıkalyq quraldar (mysaly, múgedekter arbasy, júrýge kómektesetin quraldar jáne t.b) múgedektigi bar adamdarǵa turaqty túrde emes, ýaqytsha, tegin paıdalanýǵa berilip, keıin qaıtarýdy qarastyrady.
Bul tásil qoldanystaǵy júıeni tolyqtyryp, ony neǵurlym ıkemdi etedi: endi tek paıdalaný merzimine ǵana emes, sonymen qatar jabdyqtyń naqty jaǵdaıyna da baǵa beriledi.
Osy maqsatta qurylǵan áleýmettik-tehnıkalyq saraptama qyzmetiniń mamandary tehnıkalyq ońaltý quraldarynyń jaǵdaıyn, tozý deńgeıin baǵalap, olardy ári qaraı paıdalaný, jóndeý nemese merziminen buryn aýystyrý týraly sheshim qabyldaıdy.
Eger qural ári qaraı paıdalanýǵa jaramsyz dep tanylsa, ol joıylýǵa jatqyzylyp, belgilengen paıdalaný merzimine qaramastan jańa qurylǵyǵa aýystyrylady.
Al qoldanýǵa jaramdy dep tanylsa, jóndelgen quraldar qaıta paıdalanylyp, jańa ońaltýdyń tehnıkalyq quraldaryn alýdy nemese óz quralynyń jóndelýin kútip otyrǵan múgedektigi bar adamdarǵa ýaqytsha usynylýy múmkin.
Bul rette jeke paıdalanýǵa arnalǵan quraldar, mysaly, protezder, jańa tetikte qarastyrylmaıdy.
Bıyl iske asyrýǵa josparlanǵan joba múgedektigi bar adamdardyń úzdiksiz ońalýyn qamtamasyz etýge, sondaı-aq tehnıkalyq quraldardy utymdy paıdalaný men olardyń óńirlerde qoljetimdiligin arttyrýǵa baǵyttalǵan.
Jalpy pılottyq jobaǵa 40-tan asa túrli tehnıkalyq qural, onyń ishinde júrip-turý quraldary (múgedekter arbasy) engizilgen.
Aıta ketelik múgedektigi bar jandardy baspanamen qamtamasyz etý talaptary qandaı ekeni týraly jazǵan edik.
