Múgedektigi bar azamattarǵa arnalǵan qoljetimdilik týraly aqparattyq portal jumys isteıdi
ASTANA. KAZINFORM — Qazaqstanda múgedektigi bar azamattardyń áleýmettik, kóliktik jáne ınjenerlik ınfraqurylym nysandaryna qoljetimdiligin arttyrý úshin «Múgedektigi bar adamdardy áleýmettik qorǵaý» aqparattyq portaly jumys isteıdi.
Bul týraly Astana qalasynyń kommýnıkatsııalar qyzmetinde ótken brıfıngte Halyqty áleýmettik qorǵaý salasyndaǵy retteý jáne baqylaý komıtetiniń Astana qalasy boıynsha departamentiniń basshysy Asqar Aımaǵambetov málimdedi.
Onyń aıtýynsha, portal azamattarǵa qajetti nysandardyń qoljetimdiligi týraly aqparatty jedel alýǵa múmkindik beredi.
— Portaldyń negizgi maqsaty — múgedektigi bar adamdarǵa áleýmettik mańyzy bar nysandardyń qoljetimdiligi týraly naqty aqparat usyný. Sonyń arqasynda azamattar belgili bir mekemege barmas buryn onyń qoljetimdilik deńgeıin aldyn ala teksere alady, — dedi Asqar Aımaǵambetov.
Spıkerdiń sózinshe, portal azamattar, memlekettik organdar, qoǵamdyq birlestikter jáne áleýmettik ınfraqurylym nysandarynyń ıeleri arasyndaǵy ózara baılanysty nyǵaıtyp, salanyń ashyqtyǵyn arttyrady.
Jergilikti atqarýshy organdar nysandardyń qoljetimdilik deńgeıin baǵalaıdy. Baǵalaý barysynda alty negizgi ólshem eskeriledi: kireberis bóligi, nysan ishindegi qozǵalys joldary, qyzmet kórsetý aımaǵy, sanıtarlyq-turmystyq bólmeler, aqparattyq jáne telekommýnıkatsııalyq quraldar, sondaı-aq nysan aýmaǵy.
Baǵalaý qorytyndysy boıynsha ár nysanǵa «qoljetimdi», «ishinara qoljetimdi», «qoljetimsiz» nemese «málimet joq» mártebesi beriledi.
— Bul tásil múgedektigi bar adamdar úshin nysannyń beıimdelý deńgeıin obektıvti baǵalaýǵa múmkindik beredi. Sonymen qatar derekterdiń durystyǵyn qamtamasyz etý maqsatynda portal «Mekenjaı tirkelimi» aqparattyq júıesimen yqpaldastyrylǵan. Bul mekenjaı derekterine qatysty qatelikterdiń aldyn alady, — dedi departament basshysy.
Paıdalanýshylar portal arqyly Qazaqstandaǵy beıimdelgen nysandar týraly málimet ala alady. Tirkelgen qoldanýshylar nysandardyń qoljetimdilik deńgeıin baǵalap, fotosýret qosa otyryp pikir qaldyra alady.
Departament basshysynyń aıtýynsha, portaldaǵy aqparat turaqty túrde jańartylyp otyrady. Derekterdi jańartý úderisi avtomattandyrylǵan, sondyqtan paıdalanýshylar áleýmettik ınfraqurylym nysandarynyń qoljetimdiligi týraly ózekti aqparat alýǵa múmkindik beredi.
Aıta keteıik, buǵan deıin elimizde 30,5 myńnan asa nysan ınklıýzıvti talaptarǵa saı jabdyqtalǵany týraly jazǵan edik.
