Múgedektigi bar azamattardyń quqyǵyn qorǵaý baǵytynda 485 tekserý júrgizildi
ASTANA. KAZINFORM — Jyldyń basynan beri áleýmettik ınspektorlar múgedektigi bar adamdardy áleýmettik qorǵaý jáne arnaýly áleýmettik qyzmetter kórsetý salasynda 485 tekserý júrgizdi. Bul týraly Eńbek jáne halyqty áleýmettik qorǵaý mınıstrligi málim ıetti.
Onyń ishinde 212-si jospardan tys, 167-si profılaktıkalyq baqylaý aıasynda, al 106-sy prokýratýra organdarynyń talaby boıynsha ótkizildi. Tekserý nátıjesinde anyqtalǵan buzýshylyqtardy joıý týraly 303 nusqama berilip, jalpy somasy 38,9 mln teńgeden asatyn 185 aıyppul salyndy.
— Memlekettik baqylaýmen 56 memlekettik jáne kvazımemlekettik uıymdar, 23 densaýlyq saqtaý nysandary, 94 bilim berý uıymdary, 238 áleýmettik qorǵaý uıymdary, 12 mádenıet, 1 sport nysany, 3 kólik ınfraqurylymy nysandary, 5 qoǵamdyq tamaqtaný oryndary, 29 saýda jáne 24 ózge de nysandar qamtyldy, — delingen habarlamada.
Osylaısha, QR EHÁQM Halyqty áleýmettik qorǵaý salasyndaǵy retteý jáne baqylaý komıtetiniń Almaty qalasy boıynsha departamenti bilim berý nysandarynyń halyqtyń júrip-turýy shekteýli toptary úshin qoljetimdiligine jospardan tys tekserý júrgizdi. Tekserý nátıjesinde anyqtalǵan buzýshylyqtardy joıý týraly uıǵarymdar berilip, ýákiletti tulǵalar ákimshilik jaýapkershilikke tartyldy.
— Almatyda múgedektigi bar adamdar úshin qalalyq ortanyń qoljetimdiligi máselesi kún ótken saıyn ózektene túsýde jáne bul baǵyttaǵy oń ózgerister is júzinde de baıqalyp keledi. Memlekettik mekemelerge, saýda jáne qyzmet kórsetý nysandaryna barǵan kezde arnaıy jabdyqtalǵan kireberisterdi, pandýstardy, lıftiler men taktıldi baǵyttaýshy jolaqtardy jıi kórýge bolady. Eń bastysy, nysan ıeleri qoljetimdi orta qalyptastyrýdy zań talaby retinde ǵana emes, sapaly qyzmet kórsetýdiń mańyzdy bóligi retinde qabyldaı bastady. Mundaı ózgerister múgedektigi bar azamattardyń ózderin anaǵurlym derbes sezinýine jáne qalalyq ınfraqurylymdy erkin paıdalanýǵa múmkindik beredi, — dedi III toptaǵy múgedektigi bar almatylyq turǵyn Álııa Jumaǵalıeva.
Aıta keteıik, elimizde 30,5 myńnan asa nysan ınklıýzıvti talaptarǵa saı jabdyqtaldy.
