Múgedektigi bar azamattar nysandardyń qoljetimdiligin onlaın baǵalaı alady
ASTANA. KAZINFORM — Qazaqstanda múgedektigi bar adamdar úshin nysandardyń qoljetimdiligin baqylaýdyń jańa tetigi engizilip jatyr, dep habarlaıdy Eńbek jáne halyqty áleýmettik qorǵaý mınıstrliginiń baspasóz qyzmeti.
Azamattardy aqparattandyrý quraldarynyń biri — elimiz boıynsha 42 897 nysan týraly málimetterdi qamtıtyn «Múgedektigi bar adamdardy áleýmettik qorǵaý» aqparattyq portalynyń Interaktıvti qoljetimdilik kartasy.
«Múgedektigi bar adamdardy áleýmettik qorǵaý» aqparattyq portaly QR Eńbek jáne halyqty áleýmettik qorǵaý mınıstrligi tarapynan áleýmettik qorǵaý salasyndaǵy ashyqtyqty arttyrý jáne múgedektigi bar adamdarǵa nysandardyń qoljetimdiligi týraly aqparat alýdyń yńǵaıly tetigin qalyptastyrý maqsatynda ázirlendi.
Interaktıvti karta paıdalanýshylarǵa múgedektiktiń ártúrli sanattaryn eskere otyryp, qoljetimdilik deńgeıi týraly aqparatpen tanysýǵa jáne qajetti mekemeler men uıymdarǵa barýdy aldyn ala josparlaýǵa múmkindik beredi.
— Nysandar týraly málimetterdi jergilikti atqarýshy organdar alty krıterıı boıynsha engizip, turaqty túrde jańartyp otyrady: kireberis tobynyń qoljetimdiligi, qozǵalys joldary, qyzmet kórsetý aımaǵy, sanıtarlyq-turmystyq úı-jaılar, aqparat jáne telekommýnıkatsııa quraldary, sondaı-aq irgeles aýmaqtyń qoljetimdiligi. Baǵalaý nátıjesi boıynsha árbir nysanǵa «qoljetimdi», «ishinara qoljetimdi», «qoljetimsiz» nemese «málimet joq» mártebeleriniń biri beriledi, — delingen habarlamada.
Tirkelgen paıdalanýshylar úshin nysandardyń beıimdelý sapasyn baǵalaý, pikir qaldyrý jáne fotosýretter júkteý múmkindigi qarastyrylǵan. Bul qoǵamdyq baqylaýdy damytýǵa jáne kedergisiz orta qalyptastyrý baǵytyndaǵy jumystardyń sapasyn arttyrýǵa yqpal etedi.
Sonymen qatar Portaldaǵy «Nysandardy izdeý» bóliminde «Sanatorııler» atty jeke sanat jumys isteıdi. Qazirgi ýaqytta Kartada 168 sanatorıılik-kýrorttyq uıym týraly aqparat ornalastyrylǵan, olardyń 114-i nemese 67%-y Áleýmettik qyzmetter portalynyń jetkizýshileri bolyp tabylady. Paıdalanýshylar óńiri, aýdany, ataýy nemese mekenjaıy boıynsha izdeý júrgizip, kórý, estý, tirek-qımyl apparaty buzylǵan adamdar men kreslo-arbamen qozǵalatyn azamattar úshin nysandardyń qoljetimdiligi týraly málimet ala alady.
Nysan teńgerimin ustaýshylar úshin Portalda onlaın-ózin-ózi baǵalaý saýalnamasy iske qosylǵan. Ol nysannyń qoljetimdilik deńgeıin óz betinshe baǵalaýǵa múmkindik beredi. Saýalnama nátıjesinde anyqtalǵan sáıkessizdikterdi joıý jáne nysandy belgilengen talaptarǵa sáıkestendirý boıynsha usynymdar qalyptastyrylady.
Nysandardy beıimdeý jumystary qoljetimdi orta qalyptastyrý jónindegi memlekettik saıasat aıasynda júzege asyrylýda. Interaktıvti qoljetimdilik kartasyna engizilgen 42 897 nysannyń ishinde 2026 jyldyń sońyna deıin 34 318 nysannyń qoljetimdiligin qamtamasyz etý josparlanǵan. Jergilikti atqarýshy organdardyń málimetinshe, 2026 jylǵy 15 maýsymdaǵy jaǵdaı boıynsha 30 571 nysan tolyq beıimdelgen, bul josparlanǵan kórsetkishtiń 71%-yn quraıdy.
