Múgedektigi bar adamdarǵa áýe bıletterine jeńildik jasaý týraly zań qaıta qaralady

ASTANA. KAZINFORM — Elordada múmkindigi shekteýli jandardyń áýe kóligin paıdalaný máseleleri talqylandy, dep habarlaıdy Azamattyq avıatsııa komıtetiniń baspasóz qyzmeti.

Astanada Qazaqstan Respýblıkasy Prezıdentiniń janyndaǵy Halyqtyń áleýmettik osal toptardyń quqyqtary jónindegi ýákil Kenjeǵul Seıtjan jáne QR Kólik mınıstrligi Azamattyq avıatsııa komıtetiniń tóraǵasy Saltanat Tompıeva birlesip, múmkindigi shekteýli jandarǵa áýe qyzmetin kórsetý máselelerin qarastyrdy. Bul kezdesýge Qazaqstannyń avıatsııa salasy, Halyqaralyq azamattyq avıatsııa qaýymdastyǵy (IATA), sondaı-aq qazaqstandyq jáne sheteldik áýe kompanııalarynyń ókilderi qatysty.

Kenjeǵul Seıtjan áýe kóligin paıdalanǵanda múmkindigi shekteýli jandardyń kezdesetin qıyndyqtaryn atap ótti. Al Saltanat Tompıeva áýe tasymaldarynda osy jandarǵa jaǵdaı jasaý baǵytyndaǵy jumystar týraly baıandady. Qazirgi tańda múgedektigi bar adamdarǵa áýe bıletterine jeńildikter berý máselesi boıynsha zańnamaǵa ózgerister engizý qarastyrylyp jatyr.

Qazaqstannyń avıatsııalyq ákimshiligi azamattyq avıatsııa sýbektileriniń zań talaptaryn oryndaýyn turaqty tekserip, zań buzýshylyq bolǵan jaǵdaıda shara qoldanatynyn aıtty.

Áýe kompanııalary ózderi de múmkindigi shekteýli jandarǵa qolaıly qyzmet kórsetý boıynsha atqarǵan jumystaryn tanystyrdy. Keńestiń qorytyndysynda Azamattyq avıatsııa komıtetiniń tóraǵasy barlyq kóterilgen máseleler áýe kompanııalarymen birge sheshiletinin atap ótti.

Osyǵan deıin zeınetkerler múmkindigi shekteýli jubaılaryna jeke kómekshi bola alatyny belgili boldy.