Múgedektigi bar adamdarǵa arnalǵan jumys oryndary kvotasyn oryndamaǵandarǵa jaýapkershilik kúsheıtilmek

Múgedektigi bar adamdarǵa  arnalǵan jumys oryndary kvotasyn oryndamaǵan jumys berýshilerdiń jaýapkershiligi kúsheıtilmek. Bul týraly Májilis depýtattarynyń saýalyna Premer-Mınıstr Álıhan Smaıylovtyń jaýabynda aıtylǵan, dep habarlaıdy Kazinform. 

Úkimet basshysynyń dereginshe, búgingi tańda múgedektigi bar adamdar úshin jumys oryndary kvotalaryn jergilikti atqarýshy organdar uıym qyzmetkerleriniń tizimdik sanyna qaraı 2-den 4 paıyzǵa (shtat sany 50 adamnan asatyn uıymdar úshin – 2%, 100-250 adam úshin – 3%, sany 250 adamnan asatyn uıymdar úshin – 4%) deıingi mólsherde belgileıdi. Budan bólek, jumys berýshige júktemeni yntalandyrý jáne azaıtý úshin osy jyldan bastap múgedek adamdardyń jalaqysyn memleket sýbsıdııalaý tetigi iske qosyldy. Máselen, sýbsıdııalaý jumysqa ornalastyrýdyń úsh jyly ishinde júrgiziledi: birinshi jyl – 70, ekinshi jyl – 65 jáne úshinshi jyl – 60 paıyz.

«Ákimshilik quqyq buzýshylyq týraly» Qazaqstan Respýblıkasy kodeksiniń 98-babyna sáıkes jumys berýshiniń Qazaqstan Respýblıkasynyń halyqty jumyspen qamtý salasyndaǵy zańnamasyn múgedek adamdar úshin belgilengen jumys oryndarynyń kvotasyn oryndamaý túrinde jasaǵan buzýshylyǵy eskertý jasaýǵa alyp keletinin aıta ketken jón. Bul rette ákimshilik jaza qoldanylǵannan keıin bir jyl ishinde qaıtalap buzý laýazymdy adamdarǵa kásipkerlik sýbektisine baılanysty besten on aılyq eseptik kórsetkish mólsherinde aıyppul salýǵa alyp keledi. Qazirgi ýaqytta Eńbek jáne halyqty áleýmettik qorǵaý mınıstrligi jumys berýshilerdiń belgilengen kvotany oryndamaǵany úshin jaýapkershilikti kúsheıtý máselesin qarap jatyr», - dedi Álıhan Smaıylov.

Premer-Mınıstrdiń atap ótýinshe, tıisti zańnamalyq túzetýler zańnamada belgilengen tártippen Parlament Májilisine engiziledi.