Múgedektigi bar adamdardyń tek 28 paıyzy jumyspen qamtylǵan

ASTANA. KAZINFORM – Eldegi múgedektigi bar adamdardyń jumyspen qamtý deńgeıi nebári 28%-dy quraıdy. Bul týraly Bul týraly QR Eńbek jáne halyqty áleýmettik qorǵaý vıtse-mınıstri Asqarbek Ertaev málim etti.

«Múgedektigi bar adamdar halyqtyń ekonomıkalyq jaǵynan eń osal toptarynyń biri bolyp tabylady. Memleket tarapynan jumyspen qamtý sharalary qabyldanǵanyna qaramastan, eldegi múgedektigi bar adamdardyń jumyspen qamtý deńgeıi nebári 28%-dy quraıdy. Al Ekonomıkalyq yntymaqtastyq jáne damý uıymy elderinde bul kórsetkish 60-70%-dan tómen emes», - dedi Asqarbek Ertaev.

Vıtse-mınıstrdiń aıtýynsha, kóptegen kásiporyndar múgedektigi bar adamdardy jumysqa ornalastyrý kvotasyn saqtamaıdy jáne eńbek qaýipsizdigin qamtamasyz etpeıdi.

«Eńbekke jaramdylyqty qalpyna keltirýdi, jumysqa ornalasýdy nemese jańa kásipke oqytýdy qamtıtyn kásibı eńbek ońaltýy baıaý damýda. Jumysqa ornalasýdaǵy kedergilerge beıimdelgen jumys oryndarynyń bolmaýy, tıisti bilim men tájirıbeniń jetkiliksizdigi, tómen jalaqy kiredi. Múgedektigi bar adamdardy jumysqa ornalastyrý sharalaryn ázirleý aıasynda olardyń eńbek quqyqtaryn retteý, saqtaý jáne qorǵaý boıynsha normatıvtik-quqyqtyq baza qaıta qaralatyn bolady. Bızneske áleýmettik jaýapkershilikti arttyrý jáne múgedektigi bar adamdardy jumyspen qamtýdy qamtamasyz etý úshin jumys berýshilerge kvotany oryndamaǵan jaǵdaıda bıýdjetke ótemaqy tólemderin engizý mehanızmi qarastyrylýda», - dep túıdi sózin spıker.

Buǵan deıin qazirgi tańda elimizde 732 myńnan astam múgedektigi bar adam turatyny aıtyldy. Osy oraıda múgedektik boıynsha áleýmettik járdemaqylar tólemine 2024 jyly memlekettik bıýdjetten 624,1 mlrd teńge bólingen.

Sondaı-aq, 2030 jylǵa deıingi Inklıýzıvti saıasat tujyrymdamasy ázirlendi.