Múgedektigi bar adamdardyń quqyǵy buzylsa, qaıda shaǵymdanýǵa bolady
ASTANA. KAZINFORM — 2026 jyldyń alǵashqy toǵyz aıynda múgedektigi bar adamdar men arnaýly áleýmettik qyzmet alýshylardyń quqyqtaryn saqtaý boıynsha 913 tekserý júrgizildi.
Tekserýdi QR Eńbek jáne halyqty áleýmettik qorǵaý mınıstrligine qarasty Halyqty áleýmettik qorǵaý salasyndaǵy retteý jáne baqylaý komıtetiniń aýmaqtyq departamentterindegi memlekettik áleýmettik ınspektorlar ótkizdi. Nátıjesinde anyqtalǵan zańbuzýshylyqtardy joıý týraly 625 nusqama berilip, jalpy somasy 67 mln teńgeden asatyn 290 aıyppul salyndy.
Mınıstrliktiń baspasóz qyzmetiniń málimetinshe, tekserýlerdiń 335-i jospardan tys júrgizilse, 452-si profılaktıkalyq baqylaý aıasynda ótti. Al 126 tekserý prokýratýranyń talaby boıynsha uıymdastyryldy. Mundaı tekserýler elimizdiń barlyq óńirin qamtydy. Tekserý eń kóp júrgizilgen óńirlerdiń qatarynda Almaty oblysy (110), Almaty qalasy (81), Astana qalasy (79), Túrkistan oblysy (63) jáne Batys Qazaqstan oblysy (56) bar.
Áleýmettik ınspektorlar múgedektigi bar adamdar úshin ortanyń qoljetimdiligine, qaýipsizdigine jáne qajetti áleýmettik qyzmetterdi kedergisiz alý múmkindigine erekshe nazar aýdarady. Olar arnaýly áleýmettik qyzmetterdiń kórsetilýin, áleýmettik jáne kólik nysandarynyń qoljetimdiligin, sondaı-aq ońaltý sharalarynyń oryndalýyn tekseredi.
Vedomstvo atap ótkendeı, qoljetimdi orta — ǵımaratta pandýs pen tutqalardyń bolýymen ǵana shektelmeıdi. Eń bastysy, múgedektigi bar adam ǵımaratqa kedergisiz kirip, onyń ishinde erkin qozǵalyp, qajetti qyzmetterdi qaýipsiz ári qıyndyqsyz alýy kerek. Ol úshin qozǵalys baǵytynyń barlyq ýchaskesi qoljetimdilik talaptaryna sáıkes bolýy qajet.
Memlekettik baqylaýdyń maqsaty — zańbuzýshylyqtardy anyqtap qana qoıý emes, olardy joıyp, azamattardyń quqyqtarynyń saqtalýyn qamtamasyz etý.
— Eger adam arnaýly áleýmettik qyzmet alý kezinde quqyqtarynyń buzylǵanyn baıqasa nemese nysandarǵa qoljetimdilik máselesine tap bolsa, QR Eńbek jáne halyqty áleýmettik qorǵaý mınıstrligine qarasty Halyqty áleýmettik qorǵaý salasyndaǵy retteý jáne baqylaý komıtetiniń aýmaqtyq departamentine júgine alady. Ótinishte naqty nysandy kórsetip, qandaı másele týyndaǵanyn jazý usynylady, — delingen habarlamada.
Buǵan deıin elde múgedektigi bar jandarǵa birjolǵy tólem beriletini aıtyldy.
