Múgedektigi bar adamdardy jumyspen qamtý: tsıfrlyq qyzmet engiziledi
ASTANA. KAZINFORM – Áleýmettik qorǵaý salasy jetildiriledi. Bul týraly Úkimet otyrysynda ınklıýzıvti saıasatty júzege asyrý sharalaryn talqylaý kezinde Eńbek jáne halyqty áleýmettik qorǵaý mınıstri Asqarbek Ertaev málim etti.
- Mınıstrlik birinshi jartyjyldyq bitkenge deıin kvotalardy oryndaý úshin uıymdar tizbesin tsıfrlyq esepke alý tásilin ázirleıtin bolady. Múgedektigi bar adamdardy jumysqa ornalastyrý úshin jumyspen qamtýdyń tsıfrlyq qyzmeti engiziledi. Bul qyzmet azamattardy jumyspen qamtyǵanǵa deıin proaktıvti súıemeldeıdi. Bıyldan bastap 17 myńǵa jýyq múgedektigi bar adamdy kvotamen qamtýdy josparlap otyrmyz. Bul 2025 jylmen salystyrǵanda 2 ese kóp, - dedi A.Ertaev.
Onyń aıtýynsha, áleýmettik qorǵaý salasyn transformatsııalaýdyń keshendi jumysy jalǵasyp jatyr. Negizgi mindeti – fragmentti qyzmet kórsetýden birtutas modelge kóshý. Kómek ár adamǵa jeke kórsetilip, naqty qajettilikke saı bolady.
- Birinshi baǵyt - ońaltýdyń tehnıkalyq quraldarymen qamtamasyz etý mehanızmin jetildirý. Qazirgi júıe qaıtarymsyz negizde qurylǵan. Quraldyń naqty jaı-kúıin, onyń tozýyn jáne jóndeý múmkindigin tolyq eskermeıdi. Osyǵan baılanysty jańa mehanızm engiziledi. Quraldardy jalǵa alý jáne qaıtarý shartymen qamtamasyz etý kózdelgen. Bıyl maýsymnan bastap Aqtóbe, Qaraǵandy jáne Pavlodar oblystarynda aprobatsııa bastalady. Qaıtarylǵan tehnıkalyq quraldar saraptamalyq baǵalaýdan ótedi. Sodan keıin, jóndeý, aýystyrý, qaıta paıdalaný, jalǵa berý nemese joıý týraly sheshim qabyldanady. Mysaly, múgedektigi bar adam ońaltýdyń tehnıkalyq quralyn aýystyrý merzimi ótkende júginedi. Qural paıdalanýǵa jaramdy dep tanylǵan jaǵdaıda, qurylǵy tehnıkalyq qyzmet kórsetýden ótedi. Sosyn qoldanýǵa qaıta beriledi. Aqaýlar anyqtalǵan kezde, qural qaıta paıdalaný úshin jóndeýge jiberiledi. Tehnıkalyq ońaltý quraly jaramsyz dep tanylǵanda, joıylýǵa jatady, al ótinish berýshige jańa qural beriledi, - dedi mınıstr.
Osy joba ekinshi jartyjyldyqtan bastap iske qosylmaq.
- Transformatsııanyń mańyzdy elementteriniń biri - múgedektikti syrttaı proaktıvti formatta belgileýdi damytý. Bul baǵyt boıynsha oń dınamıka baıqaldy: eger 2022 jyly syrttaı proaktıvti túrde kórsetilgen qyzmetterdiń úlesi 22% bolsa, 2026 jylǵy birinshi toqsan qorytyndysy boıynsha bul kórsetkish 46 paıyzǵa jetti, - dedi vedomstvo basshysy.
Kelesi baǵyt – múgedektigi bar balalardy ońaltýdy damytý. «Qazaqstan halqyna» qorymen birlesip, 4 aımaqta (Abaı, Pavlodar, Qyzylorda oblystary jáne Shymkent qalasy) múgedektigi bar balalardy úı jaǵdaıynda ońaltý boıynsha pılottyq joba iske asyrylyp jatyr.
Bar nátıjelerdi eskere otyryp, birinshi jartyjyldyqtyń sońyna deıin bul joba elimizdiń taǵy 4 aımaǵynda keńeıtiletin bolady (Almaty qalasynda, Almaty, Qaraǵandy jáne Aqtóbe oblystarynda).
Budan buryn habarlanǵandaı, bıyl ınklıýzıvti jumyspen qamtý múmkindigi keńeıtiledi.
