Múgedektigi bar adamdardy qorǵaý salasyndaǵy úılestirý keńesi kúsheıtildi — Bektenov
ASTANA. KAZINFORM — Premer-mınıstr Oljas Bektenov Quryltaı depýtattarynyń saýalyna bergen jaýabynda múgedektigi bar adamdardy áleýmettik qoldaý máselesine túsinik berdi.
Onyń aıtýynsha, jumystyń negizgi baǵyttary 2025 — 2030 jyldarǵa arnalǵan ınklıýzıvti saıasat tujyrymdamasynda kózdelgen. Tujyrymdama áleýmettik qorǵaý, densaýlyq saqtaý, bilim berý, jumyspen qamtý, ınfraqurylymnyń qoljetimdiligi jáne basqa da baǵyttar boıynsha vedomstvoaralyq ózara is-qımyldardy qamtıdy.
— Múgedektigi bar adamdardy áleýmettik qorǵaý salasyndaǵy Úılestirý keńesi 2005 jylǵy jeltoqsannan 2023 jylǵy maýsymǵa deıin Úkimettiń janynda jumys istedi. 2023 jylǵy 1 shildeden bastap memlekettik apparatty bıýrokratııadan arylý aıasynda Keńestiń qyzmetin úılestirý máselesi Eńbek jáne halyqty áleýmettik qorǵaý mınıstrligine júkteldi. Keńestiń ókilettik merzimi — úsh jyl. Qazirgi ýaqytta ókilettik merziminiń aıaqtalýyna (osy jyldyń 30 qyrkúıeginde) baılanysty Keńestiń jańa quramy qalyptastyrylyp jatyr. Keńeske depýtattyq korpýstyń, ortalyq memlekettik organdardyń, jergilikti atqarýshy organdardyń, ulttyq kásipkerler palatasynyń, ǵylymı-saraptamalyq uıymdardyń, áleýmettik qyzmetter portalynda tirkelgen taýarlar men qyzmetterdi berýshilerdiń, ákimderdiń keńesshileriniń jáne taǵy basqa ókilder engizilip jatyr, — delingen Oljas Bektenovtiń jaýabynda.
Onyń sózine qaraǵanda, vedomstvoaralyq úılestirýdiń tıimdiligin arttyrý maqsatynda Úılestirý keńesiniń jumys formaty, keshendi máselelerdi qaraý, jaýapty oryndaýshylar, oryndaý merzimderi men is-sharalardy baqylaý kúsheıtildi.
— Sonymen qatar múgedektigi bar adamdarǵa qatysty vedomstvoaralyq máseleler Premer-mınıstr orynbasarynyń deńgeıinde qaraý jáne úılestirý júıeli jolǵa qoıylǵan. Osylaısha, qazirgi ýaqytta múgedektigi bar adamdardy áleýmettik qorǵaý máseleleri boıynsha vedomstvoaralyq ózara is-qımyldyń ınstıtýtsıonaldyq tetigi qalyptastyrylǵan, — dedi Úkimet basshysy.
Buǵan deıin Eńbek mınıstrligi múgedektigi bar jandarǵa arnalǵan quraldardy jetkizýshilerdi jiti baqylaıtynyn jazǵan edik.
