Múgedektigi bar adamdar úshin shıpajaılyq-kýrorttyq emdeýdi akkredıtteýdi mindetteý usynyldy
ASTANA. KAZINFORM – Eńbek jáne halyqty áleýmettik qorǵaý mınıstri Asqarbek Ertaevtyń tóraǵalyǵymen Múgedektigi bar adamdardy áleýmettik qorǵaý salasyndaǵy úılestirý keńesiniń otyrysy ótti. Jıynda kedergisiz orta qalyptastyrýdy baqylaýdyń jańa tetikteri jáne ońaltý qyzmetterin tsıfrlandyrý máseleleri talqylandy.
Kún tártibindegi negizgi máselelerdiń biri – nysandardyń qoljetimdiligin baǵalaý jáne qoljetimdilik deklaratsııasyn kelisý úshin qorytyndy qalyptastyrýǵa arnalǵan Algorıtm jobasynyń tanystyrylymy boldy. QR EHÁQM Halyqty áleýmettik qorǵaý salasyndaǵy retteý jáne baqylaý komıtetiniń tóraǵasy Ilıa Skýb jańa reglament ǵımarattardyń qurylys normalaryna sáıkestigin tekserýdi júıeleýge múmkindik beretinin atap ótti.
Algorıtmge sáıkes, Komıtettiń aýmaqtyq departamentteri nysandardyń naqty qoljetimdiligin rastaý maqsatynda tekserýler júrgizedi (kireberis, júrip ótý joldary, sanıtarlyq toraptar). Baǵalaý avtoturaq oryndarynan bastap, vızýaldy jáne dybystyq navıgatsııa júıelerine deıingi 12 negizgi aımaqty qamtıdy.
Monıtorıng protsesine múgedektik máseleleri boıynsha ákimderdiń shtattan tys keńesshileri belsendi tartylatyn bolady, bul saraptamanyń ashyqtyǵy men obektıvtiligin qamtamasyz etedi.
Otyrys barysynda sondaı-aq shıpajaılyq-kýrorttyq emdeý sapasyn arttyrýǵa baǵyttalǵan zańnamalyq bastamalar qaraldy. Atap aıtqanda, «Halyq densaýlyǵy jáne densaýlyq saqtaý júıesi týraly» QR Kodeksine shıpajaılyq-kýrorttyq uıymdardy mindetti akkredıtteýdi engizýdi kózdeıtin túzetýler talqylandy.
Mınıstrlik Áleýmettik qyzmetter portaly (ÁQP) arqyly qyzmet kórsetýshilerge naqty talaptar belgileýdi usyndy. Olardyń qatarynda múgedektigi bar adamdar úshin oryndardyń keminde 10%-yn mindetti túrde rezervteý, sondaı-aq kórsetilgen qyzmettiń naqty alynǵanyn rastaý jáne jalǵan eseptilikti boldyrmaý úshin tsıfrlyq monıtorıng quraldaryn (Face-ID nemese QR-kodtar) engizý bar.
Asqarbek Ertaev múgedektigi bar adamdardyń quqyqtaryn qamtamasyz etý máseleleri aýmaqtyq departamentter tarapynan qatań baqylaýdy talap etetinin atap ótti. Otyrys qorytyndysy boıynsha salalyq bólimshelerge normatıvtik-quqyqtyq aktilerge ózgerister engizý jumystaryn jedeldetý tapsyryldy. Bul ózgerister mınıstrliktiń ońaltý standarttaryn lıtsenzııalaý jáne baqylaý salasyndaǵy ókilettikterin bekitedi.
Úılestirý keńesiniń jumysyna densaýlyq saqtaý mınıstrliginiń ókilderi, óńirlik jumyspen qamtýdy úılestirý basqarmalarynyń basshylary, sondaı-aq múgedektigi bar adamdardyń qoǵamdyq birlestikteriniń jetekshileri qatysty.
Eske sala keteıik, buǵan deıin ShQO-da múgedektigi bar jandarǵa arnalǵan arbalardy jalǵa berý júıesin engizý usynylǵanyn jazǵan edik.
