Múgedektigi bar adam úıde otyrý kerek degen taptaýryn túsinik bar – Tańsáýle Serikov

ASTANA. KAZINFORM – Ata-analar balany dárigerge ýaqtyly kórsetse, jetkinshekterdiń densaýlyǵyna qatysty kóp máseleni sheshýge bolady. Bul týraly Kazinform agenttiginiń BIZDIÑ ORTA podkastynda Májilis depýtaty Tańsáýle Serikov málim etti.

– Elimizde 740 myńnan múgedektigi bar adam bar... Ókinishke qaraı, keńestik kezeńnen qalyptasqan bir stereotıp baıqalyp otyr, ol taptaýryn túsinik múgedektigi bar adamdar úıde otyrý kerek degendi bildiredi. Bul adamdar ózi aýlaǵa shyqqysy kelgenimen, janyndaǵy týystary shyǵarmaýy múmkin, sondaı-aq múgedektigi bar adamnyń emin-erkin qozǵalýy úshin ınfraqurylym bolmaı jatady, - dedi T. Serikov.

Onyń aıtýynsha, qazir kóp jaǵdaıda ata-analar ómirge kelgen balalarynyń densaýlyǵyna tıisti deńgeıde nazar aýdarmaı jatady. Dáriger nusqaýy bolsa da, sábılerin bastapqy tekserýlerge aparmaıdy. 

– Máselen, balanyń tili shyqpaı, sóılemeı júrgenin kórip júremiz. «Atasynyń erkesi» nemese «balanyń ákesi de kesh sóılegen» degen syltaý aıtyp jatady. Nege? Osy kemshiligi medıtsınalyq uıymdarda tirkelse, erteń jumysqa tura almaýy múmkin dep qaýiptenedi. Osynyń saldarynan belgisiz bireýlerge emdeýge aparady, sheteldegi dárigerlerge kórsetip jatady. Al túbinde - báribir bastapqy dıagnozǵa alyp keledi. Osy rette, ata-analar ýaqyt ótkizip alady. Balanyń densaýlyǵyna qatysty mán-jaıdy erte anyqtap, der kezinde em-dom jasap, beıimdelgen bilimin berse, jaǵdaı basqasha bolady, - dedi depýtat. 

Sonymen qatar Tańsáýle Serikov múgedektigi bar adamdarǵa qatysty qoǵamnyń kózqarasyn áli de túzetý kerek ekenin atap ótti. 

Buǵan deıin elimizde múgedektigi bar adamdar quqyǵyn qorǵaý kúsheıtilgenin jazǵan edik.