Múgedektigi bar 15 myńnan astam adam jumyspen qamtyldy - Eńbek mınıstrligi
ASTANA. KAZINFORM – 1 shildedegi jaǵdaı boıynsha jumyspen qamtýǵa járdemdesýdiń túrli sharalarymen 15 myńnan astam múgedektigi bar adam (MbA) qamtyldy. Bul týraly Eńbek jáne halyqty áleýmettik qorǵaý mınıstrligi málimdedi.
Búgingi tańda barlyǵy erekshe qajettilikteri bar 110,9 myń adam jumyspen qamtylǵan (30%).
2025 jylǵy 1 shildedegi jaǵdaı boıynsha Qazaqstanda múgedektigi bar 743,9 myń adam turady, ol halyqtyń jalpy sanynyń 3,7%-yn quraıdy, olardyń 375,7 myńy eńbekke qabiletti jasta.
- QR Áleýmettik kodeksine sáıkes jergilikti atqarýshy organdar múgedektigi bar adamdar úshin aýyr jumystardaǵy, eńbek jaǵdaılary zııandy, qaýipti jumystardaǵy jumys oryndaryn esepke almaǵanda, jumysshylardyń jalpy sanynyń 2-den 4 %-na deıin (jaldamaly jumyskerlerdiń jalpy sany keminde 50 adam bolǵan kezde) kólemde jumys oryndaryna kvota belgileıdi. Aǵymdaǵy jyldyń 1 toqsanynda kvota boıynsha múgedektigi bar 4,8 myń adam jumysqa ornalastyryldy, - dep jazdy vedomstvodan.
Sondaı-aq erekshe qajettilikteri bar adamdar jumyspen qamtýǵa járdemdesýdiń belsendi sharalaryna tartylýda. Máselen, aǵymdaǵy jyldyń 1 shildedegi jaǵdaı boıynsha turaqty jumysqa 1,8 myń adam, jastar praktıkasyna – 141 adam, áleýmettik jumys oryndaryna – 271 adam, qoǵamdyq jumystarǵa – 3,8 myń adam, «Kúmis jas» jobasy boıynsha – 484 adam, «Alǵashqy jumys orny» jobasy boıynsha – 28 adam, «Urpaqtar kelisimsharty» jobasy boıynsha – 3 adam jumysqa ornalastyryldy.
- Qysqa merzimdi kásiptik oqytýmen 88 adam, «Bastaý bıznes» jobasy boıynsha kásipkerlik negizderine oqytýmen 2,9 myń adam qamtyldy.
Halyqtyń áleýmettik osal toptaryna jatatyn azamattarǵa óz bıznesin ashý úshin 400 AEK-ke deıingi (1,6 mln teńge) mólsherinde memlekettik granttar beriledi. Búgingi tańda 666 múgedektigi bar adam osyndaı qoldaýǵa ıe boldy, - delingen aqparatta.
Sondaı-aq, 2018 jyldan bastap halyqaralyq tájirıbeni eskere otyryp, múgedektigi bar adamdardy jumysqa ornalastyrý úshin arnaıy jumys ornyn jaraqtandyrýǵa baılanysty jumys berýshilerdiń shyǵyndaryn sýbsıdııalaý tártibi engizildi. Aǵymdaǵy jyly osyndaı 49 arnaıy jumys orny quryldy.
Aıta keteıik, Astanada múgedekterdiń atyna zańsyz avtonesıeler rásimdegen qylmystyq top ustaldy.