Múgedektigi bar jandarǵa jeńildik: 1495 adam «Otbasy bankinen» 2%-ben ıpoteka alǵan
ASTANA. KAZINFORM — Elimizde 1495 adam múgedektigi bar azamattarǵa jáne múgedektigi bar balalardy tárbıelep otyrǵan otbasylarǵa arnalǵan jeńildikti paıdalanyp, «Otbasy bankinen» 2%-ben ıpotekalyq qaryz alǵan. Bul týraly Úkimet otyrysynda Ónerkásip jáne qurylys vıtse-mınıstri Qýandyq Qajkenov málimdedi.
«Kezekte turǵan azamattar jeńildetilgen ıpotekalyq qaryzdardy Otbasy banki arqyly 2% jáne 5% paıyz tómendetilgen mólsherlememen ala alady. 2% mólsherlemesi boıynsha nesıe birinshi jáne ekinshi toptaǵy múgedektigi bar adamdar jáne múgedek balalardy tárbıelep otyrǵan otbasylarǵa beriledi. Qalǵan barlyq sanattarǵa 5% mólsherlemesi boıynsha qaryzdar beriledi», — dedi Qýandyq Qajkenov.
Vıtse-mınıstrdiń aıtýynsha, 9 aıdyń qorytyndysy boıynsha 5 746 azamat jeńildetilgen nesıe alǵan.
«Olardyń ishinde birinshi jáne ekinshi toptaǵy múgedektigi bar azamattar 851 jáne múgedektigi bar balalardy tárbıelep otyrǵan otbasylar 644», — dedi QR Ónerkásip jáne qurylys vıtse-mınıstri.
Buǵan deıin, Múgedektigi bar jandarǵa turǵyn úı alýda memleket qandaı kómek kórsetip jatqanyn jazǵan edik.
Odan bólek, Úkimet otyrysynda elimizde 203 myń múmkindigi shekteýli bala tirkelgeni habarlandy.
Sonymen qatar, múmkindigi shekteýli balalar úshin mektepte «jeke kómekshi» laýazymy engiziletini aıtyldy.
