Múgedektigi bar 10 adamdy jumyspen qamtyǵan uıymdarǵa salyqtyq qoldaý saqtalady
ASTANA. KAZINFORM — Erlan Ábdıevtiń jetekshiligimen Májilis depýtattary «Inklıýzıvti Parlament» depýtattyq tobynyń otyrysyn ótkizdi.
Kún tártibinde múgedektigi bar adamdardyń qoǵamdyq birlestikterine qatysty salyqty retteý máselesi qaraldy.
Otyrysqa depýtattarmen qatar Ulttyq ekonomıka birinshi vıtse-mınıstri Azamat Ámrın, Eńbek jáne halyqty áleýmettik qorǵaý, Qarjy mınıstrlikteriniń, sondaı-aq Eńbek resýrstaryn damytý ortalyǵynyń ókilderi qatysty.
Depýtattyq toptyń jetekshisi Erlan Ábdıev Salyq kodeksiniń jańa redaktsııasynda kózdelgen ózgeristerdiń áleýmettik mańyzdylyǵyna toqtaldy.
— 2026 jylǵy 1 qańtardan bastap Salyq kodeksi kúshine endi, soǵan baılanysty ózgerister de bar. Buǵan deıin salyq jeńildikterin alý úshin uıymdar múgedektigi bar eki adamdy ǵana jumysqa ornalastyrsa jetkilikti edi, jańa Kodekste ol 10 adamǵa deıin ulǵaıdy. Qazirgi tańda elimizde 740 myń múgedek adam bar, olardyń 410 myńy — eńbekke qabiletti jasta. Al búginde sonyń nebári 100 myńy ǵana jumyspen qamtylǵan, — dedi Erlan Ábdıev.
Depýtattyń aıtýynsha, Salyq kodeksindegi bul ózgerister jumys berýshilerdi múgedektigi bar adamdardy jumysqa belsendirek qabyldaýǵa yntalandyryp, jumyspen qamtý máselesin sheshýge yqpal etýge tıis.
Jıyn barysynda 2026 jylǵy 1 qańtardan bastap múgedek adamdar isteıtin uıymdar úshin salyq júktemesiniń aıtarlyqtaı ulǵaımaıtyny da atap ótildi. Negizgi salyq jeńildikteri saqtalǵan, al korporatıvtik tabys salyǵy boıynsha Salyq kodeksiniń 331-babynda qarastyrylǵan talaptar oryndalǵan jaǵdaıda ony 100%-ǵa deıin azaıtý tetigi engizilgen.
Osy baptyń jańa redaktsııasynda salyq jeńildikterin qoldaný sharttary naqtylanǵan. Atap aıtqanda, korporatıvtik tabys salyǵyn 100 paıyzǵa azaıtý úshin múgedektigi bar 10 adamdy jumysqa ornalastyrý jetkilikti. Sonymen qatar, osy qyzmetkerlerdiń bir mezgilde tıisti jeńildikterdi paıdalanatyn birneshe uıymmen eńbek qatynastarynda bolmaýy týraly talap engizildi. Bul memlekettik qoldaýdy nysanaly ári tıimdi etýge baǵyttalǵan.
Otyrys qorytyndysy boıynsha depýtattar Úkimetke sońǵy 10 jylda salyq jeńildikterin alyp kelgen iri uıymdar týraly taldaý júrgizý jóninde hattamalyq tapsyrma rásimdeýdi usyndy. Sol arqyly naqty jumyspen qamtylǵan múgedektigi bar adamdardyń sany men memlekettik qoldaýdyń tıimdiligi baǵalanatyn bolady. Taldaý nátıjeleri boıynsha Salyq kodeksine qosymsha ózgerister engizý múmkindigin qarastyrý josparlanyp otyr.
Aıta ketelik Parlament reformasy men bıznes quqyqtaryn qorǵaý Konstıtýtsııada bekitiledi.