Múgedekterge jaǵdaı jasalmaǵan nysandardy paıdalanýǵa qabyldamaý kerek - Úkimet basshysy
ASTANA. 28 mamyr. QazAqparat - Múgedekterge jaǵdaı jasalmaǵan nysandardy paıdalanýǵa qabyldamaý kerek.
Búgin 2012-2018 jyldarǵa arnalǵan múgedekterdiń ómir sapasyn jaqsartý jáne quqyqtaryn qamtamasyz etý boıynsha is-sharalar josparynyń birinshi kezeńiniń júzege asyrylýy qarastyrylǵan Úkimet otyrysynda QR Premer-Mınıstri Serik Ahmetov osylaı málim etti.
Úkimet basshysy óz sózinde múmkindigi shekteýli jandardyń turǵyn úılerge, bilim berý, densaýlyq saqtaý, mádenı jáne sporttyq nysandarǵa kirip-shyǵý múmkindigin qamtamasyz etýge basa nazar aýdartty.
«Mundaıda eshqandaı formalızm men meıirimsizdik bolmaýy tıis. Árıne, bul baǵytta 2006-2008 jyldarǵa arnalǵan múgedekterdi ońaltý memlekettik baǵdarlamasyn júzege asyrý aıasynda jospar qabyldanǵanǵa deıin jumystar júrgizildi. Degenmen, qoǵamnyń, onyń ishinde múgedekterdiń kóńilinen shyǵatyn nátıjeler bolǵan joq», - dedi S.Ahmetov.
Sondaı-aq ol elimizdiń óńirlerinde múmkindigi shekteýli azamattardy qajetti jerine aparyp, alyp kelý baǵytyndaǵy jumystardyń durys júrgizilmeı otyrǵandyǵyn basa aıtty. «102 ınvataksı jumys isteıdi. Men ákimderdiń nazaryn aýdartqym keledi. Ortasha alǵanda óńirlerde 7-8 ınvataksı bar. Endi, qurmetti bizdiń ákimder bul kóp pen álde az ba, sanańyzdar», - dedi Úkimet basshysy.
S.Ahmetov kóptegen nysandarda múgedekterge arnalǵan pandýstar salynǵanymen olardyń syn kótermeıtindigine erekshe toqtalyp ótti. «Ózderińiz qarańyzdarshy, birqatar pandýsta tipti deni saý adamnyń ózi kóterilýge ne bolmasa tómen túsýge júregi daýalamaıdy. Mundaı jaǵdaıda nysan paıdalanýǵa qabyldanbaýy kerek», - dedi Premer-Mınıstr.
