Múgedekterge kútim jasaıtyndarǵa tólenetin járdemaqy mólsheri qansha
ASTANA. QazAqparat - Qazaqstanda arnaýly áleýmettik qyzmetter kórsetetin úkimettik emes uıymdar sany eleýli túrde artty. Bul týraly Parlament Senatynda depýtattarmen kezdesý barysynda Eńbek jáne halyqty áleýmettik qorǵaý mınıstri Mádına Ábilqasymova málim etti, dep habarlaıdy QazAqparat tilshisi.
«Qazirgi kezde Qazaqstanda múgedek adamdardy áleýmettik qamsyzdandyrýdyń eki deńgeıli júıesi júzege asyrylýda. Bazalyq deńgeıge memlekettik bıýdjetten tólenetin bazalyq áleýmettik járdemaqylar, arnaýly áleýmettik qyzmetterdi kórsetý jáne ońaltýdyń tehnıkalyq quraldarymen qamtamasyz etý jatady. 2018 jylǵy1 qańtardan bastap eń tómengi kúnkóris deńgeıiniń ózgerýine baılanysty múgedektik boıynsha járdemaqylardyń mólsheri 16 paıyzǵa deıin arttyryldy. 2017 jyly memlekettik áleýmettik járdemaqy alýshylar sany 507,7 myń adamdy, ortasha mólsheri 32 418 teńgeni qurady», - dedi M. Ábilqasymova.
Sonymen qatar mınıstr Elbasynyń tapsyrmasy boıynsha 2018 jylǵy shildeden bastap bala kezinen kámelet jastaǵy І toptaǵy múgedekterge kútim jasaıtyn adamdarǵa tólenetin járdemaqynyń jańa túri engizilgenin eske salyp ótti. Búgingi kúni járdemaqy 10 myń otbasyǵa taǵaıyndalyp, onyń mólsheri 29 699 teńgeni qurady.
«Arnaýly áleýmettik qyzmetterdiń kepildendirilgen kólemine qyzmetterdiń 8 túri kiredi. 2018 jylǵy 1 qańtardaǵy jaǵdaı boıynsha 881 uıymda erekshe qajettilikteri bar 116 myń adamǵa, onyń ishinde 54 myńnan astam múmkindigi shekteýli janǵa qyzmet kórsetildi. Osy baǵytta azamattyq sektordyń qatysýy damyp keledi. Mysaly, arnaýly áleýmettik qyzmetter kórsetetin ÚEU-lar sany 2009 jyly tórteý bolsa, 2017 jyly 130-ǵa deıin kóbeıdi», - dedi vedomstvo basshysy.
M. Ábilqasymovanyń sózine qaraǵanda, 2017 jyly múgedekterdi áleýmettik qamsyzdandyrýǵa jáne kómek kórsetýge bıýdjetten 250 mlrd teńge bólinse, 2018 jylǵa 302 mlrd teńge josparlanyp otyr.
