Múgedekterge kottedj qalashyǵyn salý jobasyn usynamyz - Quralaı Baımenova
Úkimettik emes uıym ókilderiniń búgingi bas qosýynda múmkindigi shekteýli azamattardyń ómir súrý sapasyn arttyrý jáne quqyqtaryn qamtamasyz etý jónindegi 2025 jylǵa deıingi josparyna usynystar qabyldandy. Qazir Aqtóbe oblysynda 26 myńǵa jýyq múgedek bar. Olar 15 úkimettik emes uıymmen tyǵyz baılanys jasap, saýyqtyrý, mádenı-aǵartý sharalaryna qatysady.
«Sońǵy kezderi úkimettik emes uıymdar bir bólek, múmkindigi shekteýli jandar bir bólek júrgen sekildi seziledi. Kún saıyn 5-6 adam qabyldaýyma kelip, qarapaıym suraqtar qoıady. Demek olar beriletin kómekter men jeńildikter týraly tolyq bilmeıdi, aqparattandyrylmaǵan. Sondyqtan úkimettik emes uıym ókilderi kún saıyn 3-5 adammen kezdesip, el ishinde atqarylyp jatqan ister men jańa múmkindikter týraly aıtyp otyrýy kerek. Zańdaǵy ózgertýler men tolyqtyrýlar da mańyzdy», - dedi Aqtóbe qalalyq sal aýrýyna shaldyqqan azamattardy qoldaý ortalyǵynyń jetekshisi, Qazaqstannyń Eńbek Eri Quralaı Baımenova.
Jıyn kezinde memlekettik-jekeshelik áriptestik aıasynda atqarylyp jatqan oń isterdiń artqany aıtyldy. Máselen, Aqtóbe qalasyndaǵy «Jaına» ortalyǵynda múmkindigi shekteýli balalar turaqty em alady. Sonymen qatar «Ǵajap» ońaltý ortalyǵy aýmaǵyn keńeıtip, balalardyń qarapaıym ómirge aralasýyna septigin tıgizdi. Al kózi kórmeıtin jandar tigin tsehynda jumys istep, tapsyrys qabyldaıdy.
«Elimiz boıynsha múgedekterdi qoldaýǵa arnalǵan biryńǵaı qor joq. Sondyqtan qıyn jaǵdaıǵa tap bolyp, arbaǵa tańylǵan adamdar elden aqsha jınaýǵa kómek suraıdy. Bul durys emes. Aqtóbede múgedekterdi ıntegratsııalaý qory bolsa bárine bir jerden kómek kórsetiletin edi. Qazir ár jerlerde qaıyrymdylyq sharasy uıymdastyryp, kómek kórsetilip jatyr. Munyń bári shashyrańqy, endi júıeli bolǵany durys. Sonymen qatar biz Aqtóbede múgedekterge arnalǵan kottedj qalashyǵyn salý jobasyn usynamyz. Bári ashyq, úılerdiń arasyna tas jol tóseledi. Sol kezde biz óz kúshimizden bir-birimizge baryp, baılanys jasar edik. Múgedekterge beıimdelgen qalashyqta jańa mamandyq ıgerýge, biliktiligin arttyrýǵa arnalǵan kýrstar da bolady», - dedi Quralaı Baımenova.
