Múgedekterge arnalǵan orynǵa kólik qoıǵan júrgizýshiler 50 AEK kóleminde aıyppul tóleıdi
ASTANA. QazAqparat - Elordada múgedekterge arnalǵan turaqtarǵa kólik qoıý erejelerin buzý jaǵdaılaryn anyqtaýǵa baǵyttalǵan reıd sharasy ótkizildi. Bul týraly astana.kz saıtyna Astana qalasynyń Ákimshilik polıtsııa basqarmasynan habarlady.
«Elordada osyndaı reıd ótkizýge múgedek júrgizýshilerden Astana qalasynyń ІІD jáne qala ákiminiń saıtyna kelip túsken ótnishter negiz boldy. Olar kólik qoıatyn orynnyń joqtyǵyna shaǵymdanǵan. Al arnaıy bólingen jerlerge basqa kólik quraldary toqtaıdy», - dedi Astana qalasynyń ІІD ÁPB JPQ bóliminiń bastyǵy Rústem Ómirbekov.
Múgedekterge kólik qoıýǵa arnalǵan jerlerge (turaqqa) kólik qoıýǵa tyıym salynady. Biraq keıbir júrgizýshiler bul erejeni saqtamaıdy. Osyǵan baılanysty Qazaqstanda osy talapty buzǵany úshin 50 AEK mólsherinde aıyppul tóleý túrinde ákimshilik jaýapkershilik engizildi.
«Eki kúnniń ishinde múgedekterge arnalǵan oryndarǵa kólik qoıý nemese toqtaý erejelerin buzǵany úshin 20 astam ákimshilik hattama toltyryldy, 6 memlekettik nomer belgisi tárkilendi. Tártip buzýshylarǵa 50 AEK mólsherinde aıyppul salynyp, ákimshilik jaýapkershilikke tartyldy», - dedi ol.
Elordalyq basqarma qyzmetkerleri kólik júrgizýshilerge osy sııaqty buzýshylyqtar ákimshilik jaza qoldanylǵannan keıin bir jylda birneshe ret qaıtalanǵan jaǵdaıda, aıyppul mólsheri 70 AEK-ty quraıtynyn eskertedi.
