Múgedekterge arnalǵan orynǵa kóligin qoıǵan polıtseıler aqtóbelikterdiń ashýyna tıdi
AQTÓBE. QazAqparat - Aqtóbede múmkindigi shekteýli jandarǵa arnalǵan kólik turaǵyna polıtsııa qyzmetkerleriniń mashınasy qoıylǵan.
Áleýmettik jelidegi «Aktobe_online» paraqshasyna salynǵan sýret aqtóbelikterdiń ashýyna tıdi, dep habarlaıdy QazAqparat tilshisi.
Sýrettegi «D 150 KP» nómirli kóligi polıtsııa qyzmetkerine tıesili. Qyzmettik kólik múgedekterge arnalǵan orynǵa qoıylǵan. Aqtóbe qalasyndaǵy «Tabys» kommýnaldyq bazaryndaǵy bul kórinis áleýmettik jelige salynyp, qala ákimdigine jiberilgen. Al jeli qoldanýshylary polıtseılerdiń bul áreketin synap, olarǵa aıyppul salýdy surady. Biri «bul kezekti oqý-jattyǵý jumystary», dep kekesin oılaryn bildirse, keıbiri tártip saqshylaryna báribir esh jaza qoldanylmaıtynyn aıtyp, ókinishterin bildirdi.
«Olarǵa turýǵa bolady, zań tek qarapaıym adamdarǵa»,- dep jazady Mahambetqalı Jańabergenov.
Aıta keteıik, jańa jyldan bastap elimizde 1 AEK quny 2 269 teńge boldy. Múgedekterge arnalǵan kólik turaǵyna mashınasyn zańsyz qoıǵan júrgizýshilerge 50 AEK kóleminde, ıaǵnı, 113 450 teńge aıyppul salynýy tıis.
