Múgedekterge arnalǵan kıimderdiń baǵasy qandaı bolady
ASTANA. QazAqparat - Qazaqstanda arbaǵa tańylǵan azamattarǵa arnalǵan kıim-keshekter tigiledi, tipti aıaq kıimdi de shyǵarý josparlanyp otyr, dep xabarlaıdy QazAqparat tilshisi.
Jeńil ónerkásip kásiporyndary qaýymdastyǵynyń prezıdenti Lıýbov Hýdovanyń aıtýynsha, búginde múgedek jandarǵa arnalǵan kıimniń alǵashqy toptamasy shyǵaryldy. Onyń ishinde shalbar, pancho, aıaqty oraıtyn qap, jempir jáne taǵy basqa kıim úlgileri bar.
«Kıimdi tikkende biz aldymen ony kıip-sheshýge yńǵaıly bolatyndaı etip shyǵarýǵa tyrystyq. Bul - arbaǵa tańylǵan azamattardyń basty tilegi. Máselen, qazirgi kezde olar aıaqty kórpeshemen jaýyp júredi. Biz bolsaq, arnaıy chexol-qapty shyǵardyq. Ony kııý de, taǵý da yńǵaıly. Sosyn jerge túse bermeıdi. Sol sııaqty shalbardy da arnaıy eskızben tikken. Arbamen júretinder shalbar kıgende tizeniń astynda mata jıyrylyp, qatty qajaıdy. Jańa úlgide biz artyq matany alyp tastadyq ta, ol jerdi jıyrylmaıtyndaı istedik. Balaǵy da jerge qaıta-qaıta túse bermeıdi», - deıdi L.Hýdova.
Onyń sózine qaraǵanda, búginde ulttyq oıý-órnekpen kómkerilgen kıim-keshektiń baǵasy ár túrli. Shalbar 6 myń teńgeniń aınalasynda bolsa, pancho 28 myń teńgege deıin barady. Alaıda aldaǵy ýaqytta kıimdi barynsha qaraıym ári yńǵaıly etip shyǵarýdyń arqasynda ónimniń baǵasy da arzandaıdy.
Múgedekterge arnalǵan kıim-keshektiń arzandaǵanyn «Dos» táýelsiz ómir» ortalyǵynyń basshysy Ardaq Otorbaev ta qoldap otyr. Onyń aıtýynsha, búginde ondaı kıim birinshi toptaǵy múgedektiń qaltasyna shaq kelmeıdi. Sondyqtan ony barynsha arzan etip shyǵarǵan durys.
Aıta keteıik, múgedekterge arnalǵan kıim «Adaptive Clothing and Shoes» jobasy aıasynda shyǵarylady. Ázirshe, oǵan memlekettik tapsyrys joq. Sondyqtan bastama avtorlary iri kompanııalardyń kómegine senip otyr. Aldaǵy ýaqytta kıim-keshektiń jańa toptamasy Astana men Almaty qalalarynda arnaıy dúkenderde satylady degen jospar bar. Sondaı-aq oǵan ǵalamtor arqyly tapsyrys berýge bolady.
