Múgedekterge arendalyq baspanany berý máselesi qaralatyn bolady

Bul týraly búgin QR Prezıdenti janyndaǵy Ortalyq kommýnıkatsııalar qyzmetiniń baspasóz máslıhatynda «Báıterek» ulttyq holdınginiń basshysy Qýandyq Bıshimbaev málim etti.

«Múgedekterge arnaıy sanat qarastyrylmaǵan. Arendalyq baspananyń 50 paıyzy jas otbasylar arasynda úlestiriledi. Onyń ishinde de olar túrli sanattarǵa bólinedi: memlekettik qyzmetkerler, bıýdjet qyzmetkerleri bolýy múmkin. Sondyqtan olar páterdiń 50 paıyzyn mindetti túrde alady. Múgedekterge arnaıy kvota berilgen emes. Biraq qazir ol suraq qaralýda. Baǵdarlamanyń basty mindeti o bastan aq elde eńbek etip, bala tárbıelep júrgen jas otbasylardy baspanamen qamtamasyz etý bolǵan. Ásirese otbasyda birneshe balalary bar januıalardyń ómir sapasyn jaqsartý», - dep atap ótti Q. Bıshimbaev.

Onyń sózine qaraǵanda, 30 jasqa deıingi jas otbasylar basym sanatqa ıe bolyp qala bermek.

«Múgedekter boıynsha másele jeke qaralatyn bolady. Tıisti sheshim jasalsa, jeke habarlandyramyz», - dedi ol.