Múgedekterge áleýmettik qoldaý aıasynda 285,7 mlrd teńgege járdemaqy tólendi

ASTANA. KAZINFORM – Eńbek mınıstrligi 2025 jyldyń birinshi jartyjyldyǵyndaǵy jumys qorytyndysyn shyǵardy. Bul týraly vedomstvonyń baspasóz qyzmeti málim etti.

Shara barysynda halyqty jumyspen qamtýǵa járdemdesý jáne eńbek qatynastaryn retteý, Inklıýzıvti saıasat tujyrymdamasyn iske asyrý, tsıfrlandyrý jáne kóshi-qon protsesteri máseleleri qaraldy.

Birinshi vıtse-mınıstr Asqarbek Ertaevtyń tóraǵalyǵymen ótken otyrys vıtse-mınıstrlerdiń, vedomstvo departament basshylarynyń, memlekettik eńbek ınspektsııasy komıteti, kóshi-qon, halyqty áleýmettik qorǵaý salasyndaǵy retteý jáne baqylaý komıtetteriniń, sondaı-aq vedomstvolyq baǵynysty uıymdardyń basshylarynyń qatysýymen ótti.

Onlaın rejıminde oblystar men respýblıkalyq mańyzy bar qalalar ákimderiniń orynbasarlary, jumyspen qamtýdy úılestirý jáne áleýmettik baǵdarlamalar basqarmalarynyń, mınıstrlik komıtetteriniń aýmaqtyq departamentteriniń, mınıstrlikke vedomstvolyq baǵynysty uıymdardyń fılıaldarynyń basshylary, sondaı-aq Eńbek jáne halyqty áleýmettik qorǵaý jónindegi qoǵamdyq keńestiń músheleri qatysty.

Otyrysta sóz bastaǵan Birinshi vıtse-mınıstr Qazaqstan halqyna oń áser etetin naqty nátıjelerge qol jetkizýdiń qanshalyqty mańyzdy ekenin atap ótti.

— Eseptik kezeńde mınıstrlik barlyq júktelgen mindetterdiń oryndalýyn qamtamasyz etti, al memlekettiń barlyq áleýmettik mindettemeleri ýaqtyly jáne tolyq kólemde oryndalýda, — dep atap ótti Asqarbek Ertaev.

Sonymen qatar negizgi kórsetkishterge qysqasha toqtaldy.

Máselen, 2025 jyldyń 6 aıynda jergilikti atqarýshy organdardyń málimeti boıynsha óńirlik jumyspen qamtý kartalary aıasynda 250 myń adam jumysqa ornalastyryldy.

23 myńnan astam adamnyń eńbek quqyǵy qorǵaldy. Qaýipsiz eńbek jaǵdaılaryn qamtamasyz etý boıynsha qabyldanǵan sharalar óndiristik jaraqattanýdy 16,6%-ǵa tómendetýge múmkindik berdi.

Múgedekterdi áleýmettik qoldaý aıasynda jalpy somasy 285,7 mlrd teńgege járdemaqylar men tólemder jasaldy. Áleýmettik qyzmetter portaly arqyly 300 myńnan astam tehnıkalyq quraldar men ońaltý qyzmetteri kórsetilse, 18,6 myń adam múgedekterge arnalǵan taksı qyzmetin paıdalandy.

Ári qaraı Eńbek mınıstrliginiń ókilderi vedomstvo qyzmetiniń negizgi baǵyttary týraly tolyq aqparat berdi.

Alǵashqy sózdi vıtse-mınıstr Asqar Bıahmetov aldy. Ol aralyq nátıjeler men josparlar, sondaı-aq jumyspen qamtýǵa járdemdesý boıynsha aldaǵy jumystarǵa toqtaldy. Ol 2025 jyldyń birinshi jarty jyldyǵynyń qorytyndysy boıynsha halyqty jumyspen qamtýǵa járdemdesýdiń belsendi sharalaryn júzege asyrý kórsetkishterine keńinen toqtaldy.

— Túrli sharalarmen 196 myńnan astam adam qamtyldy, onyń 48,1 myńy kásiptik oqytýmen, 30,8 myńy «Bastaý bıznes» jobasy boıynsha kásipkerlik negizderine oqytyldy, 113,7 myń adam sýbsıdııalanǵan jumys oryndaryna ornalasty, al áleýmettik osal toptaǵy 4,2 myń adam memleket tarapynan óteýsiz járdemaqy aldy, — dedi Bıahmetov.

Vıtse-mınıstr sondaı-aq jumyspen qamtýdyń belsendi sharalaryn qamtamasyz etý standarttaryn jetildirý, jumyspen qamtý salasynda tsıfrlyq jobalardy iske asyrý jáne t. b. boıynsha atqarylyp jatqan jumystarǵa toqtaldy.

Jetisý oblysy ákiminiń orynbasary Marlen Kólbaev pen Túrkistan oblysy ákimdiginiń jumyspen qamtýdy úılestirý jáne áleýmettik baǵdarlamalar basqarmasy basshysynyń mindetin atqarýshy Almas Ábdiqadirov óz óńirleri turǵysynan osy sala boıynsha naqty kórsetkishtermen tanystyrdy.

Kelesi kezekte vıtse-mınıstr Vıktorııa Shegaı 2030 jylǵa deıingi Inklıýzıvti saıasat tujyrymdamasyn iske asyrý barysy týraly baıandama jasady.

– Elimizde ınklıýzıvti qoǵam men qolaıly orta qurý úderisi fızıkalyq, ıntellektýaldyq, áleýmettik jáne basqa da erekshelikterge qaramastan múgedekter úshin qoǵamdyq ómirdiń barlyq salalarynda teń múmkindikterge qol jetkizýge yqpal etedi. Jańa memlekettik ınklıýzıvti saıasatty orta merzimdi perspektıvada iske asyrý kedergilerdi joıýǵa jáne teń múmkindikterdi qamtamasyz etýge basa nazar aýdara otyryp, múgedekterdiń qajettilikterin eskerip, halyq úshin ınklıýzıvti ortany qurýdyń áleýmettik-quqyqtyq modeline negizdeledi, — dedi vıtse-mınıstr.

Ol erekshe qajettilikteri bar adamdarǵa qyzmet kórsetýdi keńeıtý boıynsha júzege asyrylyp jatqan sharalar týraly aqparatpen bólisti: arnaýly áleýmettik qyzmetter kórsetetin uıymdardy lıtsenzııalaý, olar úshin jan basyna qarjylandyrýdy engizý, áleýmettik qyzmetter portalyna múgedekterge taksı qyzmetin engizý.

Vıtse-mınıstrden soń sóz kezegin alǵan elorda ákiminiń orynbasary Erik Meıirhanov, «ERDO» AQ vıtse-prezıdenti Baqtııar Jazyqpaev jáne QR Eńbek jáne halyqty áleýmettik qorǵaý mınıstriniń keńesshisi Zahıra Begalıeva múgedekterge qoldaý kórsetý sharalary týraly aıtty.

Vıtse-mınıstr Oljas Anafın kezdesýge qatysýshylardy áleýmettik-eńbek salasyn tsıfrlandyrýdyń barysy jáne aǵymdaǵy jyly atqarylǵan jumystardyń qyzmet alýshylardyń yńǵaılylyǵyn arttyrýǵa jáne olardy kórsetý úderisteriniń ashyqtyǵyn qamtamasyz etýge tıgizgen áseri týraly habardar etti.

Ol sonymen qatar úı sharýashylyqtarynyń áleýmettik-ekonomıkalyq osaldyǵy men turaqtylyǵyn baǵalaýdyń skorıngtik modelin engizý jáne tsıfrlyq jumyspen qamtý ekojúıesinde jasandy ıntellekt elementteri týraly aıtty.

Іs-sharanyń qorytyndy bóliminde Kóshi-qon komıtetiniń tóraǵasy Áset Shonov kóshi-qon protsesterin retteý máseleleri týraly habardar etse, Memlekettik eńbek ınspektsııasy jónindegi komıtetiniń tóraǵasy Meırambek Ahmetov eńbekti qorǵaýdy qamtamasyz etý jáne qazaqstandyqtardyń eńbek quqyqtaryn qorǵaý salasyndaǵy aǵymdaǵy jumys baǵyttaryna toqtaldy.

Alqa otyrysyn qorytyndylaǵan Asqarbek Ertaev aǵymdaǵy jyldyń ekinshi jartyjyldyǵynda sheshýdi qajet etetin birqatar mindetterdi belgiledi.

– Bizdiń birinshi kezektegi mindetimiz — sapaly kásibı daıarlaý, eńbek naryǵyn damytý, eńbek jáne áleýmettik quqyqtardy qorǵaý, sondaı-aq ataýly jáne tıimdi áleýmettik qoldaý arqyly árbir azamattyń laıyqty ómir súrýine jaǵdaı jasaý. Biz Elbasy men Úkimet belgilegen strategııalyq maqsattardy basshylyqqa ala otyryp, bul maqsattardy dáıekti jáne júıeli túrde júzege asyratyn bolamyz, — dep túıindedi Ertaev.

Aıta keteıik, zeınetaqy jınaǵy bar jumysshy qazaqstandyqtar ǵana eńbekpen qamtylǵan bolyp esepteledi.