Múgedekterdiń saılaýda daýys berýine barlyq jaǵdaı jasalmaq

ASTANA. QazAqparat - Búgin QR Ortalyq saılaý komıssııasynyń keńeıtilgen otyrysy ótti. Jıyn barysynda múmkindigi shekteýli azamattardyń saılaý quqyqtaryn qamtamasyz etý máselesi qaraldy, dep habarlaıdy QazAqparat tilshisi.

«Elimizde 580 myńnan astam múgedek azamat bar,  barlyǵy da saılaý quqyǵyna ıe.  Olardyń saılaý quqyqtaryn qamtamasyz etý BUU konventsııasynyń talaby jáne atalǵan qujatty elimiz ratıfıkatsııalaǵan.  Jalpy múgedekterdiń saılaý quqyǵyn qamtamasyz  etý búginde Ortalyq saılaý komıssııasy qyzmetiniń basty baǵyttarynyń biri bolyp otyr. Óıtkeni, buǵan deıin ol kisiler úılerinen daýys beretin. ıAǵnı, olar ótinish jazǵannan keıin, komıssııa músheleri úılerine baratyn edi», - dedi shara barysynda BAQ ókilderine suhbat bergen QR OSK múshesi Lázzat Súleımen.

Onyń aıtýynsha, elimizde qazir múgedekterdi áleýmettendirý, olardy qoǵamdyq jumysqa, qoǵamdyq uıymdarǵa tartý máselelerine aıryqsha nazar aýdarylyp otyr. 

«Qazir saılaý ýchaskesine kelip daýys bergisi keletin múgedekterdiń sany arta túsýde. Al ol adamdar ýchaskege kelgennen keıin qajettilikterine saı materıaldar, bıýletenderdi daıyndaý Ortalyq saılaý komıssııasynyń mindeti. Osyǵan oraı, QR OSK bul baǵytta birqatar júıeli jumystar jasady. Eńbek jáne halyqty áleýmettik qorǵaý mınıstrliginen múgedekterdiń tizimin aldyq. Ony respýblıka saılaýshylarynyń tizimine qostyq», - dedi QR OSK múshesi.

Lázzat Súleımenniń sózine qaraǵanda, osy jumys arqyly eń aldymen qaı ýchaskege múgedekter úshin qajetti jaǵdaı jasaý qajettigi anyqtalady. Al ýchaskelerdi múgedekterdiń múmkinshiligine qaraı jabdyqtaýǵa qajetti qarajat kólemin anyqtaý jergilikti atqarýshy bılikke tapsyrylǵan.  Qazirgi ýaqytta Ortalyq saılaý komıssııasy jergilikti atqarýshy organdardyń usynysyn kútip otyr.