Múgedekterdiń ómir sapasyn jaqsartýǵa baǵyttalǵan Ulttyq is-qımyl jospary jyl sońyna deıin qabyldanady

Búgin Parlament Májilisinde «Múmkindigi shekteýli azamattardyń quqyqtaryn qamtamasyz etý máseleleri» taqyrybynda ótken Úkimet saǵatynda Eńbek jáne halyqty áleýmettik qorǵaý mınıstri Gúlshara Ábdiqalyqova osylaı málim etti.

Mınıstrdiń aıtýynsha, qazirgi tańda elimizde múmkindigi shekteýli jandar úshin qorshaǵan ortaǵa qoljetimdilikti qamtamasyz etý máselesi asa ózekti bolyp tabylady. «Jergilikti jerlerde osy maqsatqa qajetti jaǵdaıdy týdyrý isteri óte baıaý júrip jatyr. Máselen, elimizdegi nysandardyń basym bóliginde múgedekterdiń arbasymen júretin joldary men qondyrǵylary ornatylmaǵan. Jaıaý júrginshiler ótetin joldardyń 20-dan bir bóligi ǵana arnaıy dybys pen jaryq beretin qurylǵylarmen jabdyqtalǵan. Al avtobýstardyń 3,6 paıyzy ǵana múgedekterdiń minýine-túsýine qajetti jabdyqpen jaraqtalǵan» , - deıdi G. Ábdiqalyqova.

Onyń aıtýynsha, múmkindigi shekteýli jandardy áleýmettik kiriktirý problemalaryn sheshý maqsatynda mınıstrlik Qazaqstandaǵy múgedekterdiń ómir súrý sapasyn jaqsartý jáne quqyqtaryn qamtamasyz etý jónindegi Ulttyq is-qımyl josparyn ázirlegen. «Búgingi kúni atalmysh jospardy iske asyrýdyń bes baǵyty aıqyndaldy. Birinshiden, múgedekterdiń tynys-tirshiliginiń negizgi salalaryndaǵy nysandarǵa qoljetimdiligin qamtamasyz etý kózdeledi. Osy sanattaǵylarǵa qatysty qyzmetterdiń qoljetimdiligin arttyrý da qarastyrylyp otyr. Budan bólek, múgedekterdi áleýmettik qorǵaý jáne ońaltý júıelerin jetildirý de kózdeledi. Statıstıkalyq esep pen derekter jınaqtaýdy jetildirýge de basymdyq beremiz», - deıdi mınıstr.

Sóz sońynda vedomstvo basshysy depýtattyq korpýs tarapynan bolýy múmkin usynystardy talqylaýǵa ázir ekendigin tanytty. «Ulttyq jospardy jan-jaqty tolyqtyryp, jyl sońyna deıin qabyldaýdy kózdep otyrmyz», - dedi mınıstr.