Múgedekterdi áleýmettik qorǵaý salasyndaǵy keńes quramy jańarady
«Qazaqstan Respýblıkasynda múgedektigi bar adamdardyń quqyqtaryn qamtamasyz etý jáne ómir súrý sapasyn jaqsartý jónindegi 2025 jylǵa deıingi ulttyq jospar aıasyndaǵy jumystyń ashyqtyǵyn arttyrý maqsatynda múgedekterdi áleýmettik qorǵaý salasyndaǵy respýblıkalyq keńes quramyn jańartý týraly sheshim qabyldandy. Úılestirý keńesiniń jańa músheleri Qazaqstan Respýblıkasy Eńbek jáne halyqty áleýmettik qorǵaý mınıstrliginiń saıtynda onlaın daýys berý arqyly tańdalady», - dep atap ótedi vedomstvodan.
Mınıstrlik dereginshe, Úılestirý keńesi 2014 jyly qurylyp, quramy 6 jyl boıy jańartylmaǵan. Búgingi kúni Úılestirý keńesine 26 adam kiredi. Olardyń arasynda sańyraýlar, zaǵıptar, sal aýrýyna shaldyqqan azamattar, jastar múgedekter qoǵamynyń, múgedek áıelderdiń, joǵary bilimdi múgedekter birlestikteriniń ókilderi bar. Úılestirý keńesin jańartý birneshe kezeńde júzege asyrylady. Birinshi kezekte múmkindikteri shekteýli belsendi azamattardyń barynsha qatysýymen óńirlik keńester qurylady. Árbir oblysta quramyna keminde 20 adam kiredi. Óńirlik úılestirý keńesterinen respýblıkalyq keńestiń quramyna 1 ókilden tańdap alynady.
Múmkindigi shekteýli adamdardyń qatarynan Úılestirý keńesi múshelerin tańdap alý onlaın daýys berý arqyly júrgiziledi. QR Eńbek jáne halyqty áleýmettik qorǵaý mınıstrliginiń resmı saıtynda aqpan aıynyń sońynda áleýetti úmitkerlerden ótinimder qabyldaý bastalady. Jeńimpazdar anyqtalǵannan keıin Úkimet qaýlysyna ózgerister engiziledi.
