Múgedekterdi áleýmettik qorǵaý baǵytynda ulttyq zańnamany jetildire túsý kerek - B. Áıtimova
ASTANA. QazAqparat - Múgedekterdi áleýmettik qorǵaý baǵytynda ulttyq zańnamany jetildire túsý kerek. Búgin Parlament Senatynyń jalpy otyrysynda depýtat Birǵanym Áıtimova osy máseleni kóterdi.
Eske salaıyq, Senat «Múgedekterdiń quqyqtary týraly konventsııany ratıfıkatsııalaý týraly» QR Zańyn qabyldaǵan bolatyn.
«Atalǵan konventsııany ratıfıkatsııalaý múmkindigi shekteýli jandardyń qoǵam ómirine tolyqqandy qatysýyna zor yqpal etedi. Osy arqyly elimizdegi 600 myńnan astam adamǵa, olardyń otbasylarynda keleshekke degen úmit oty oıanyp, ózderin qoǵamnyń tolyqqandy múshesi ekendigin sezinedi. Sondyqtan da bul memlekettik mańyzdy qujatty qabyldaý arqyly múmkindigi shekteýli jandardyń tirshilik áreketi men qoǵamǵa kirigýi úshin teń quqyqtar men birdeı múmkindikter jasaý qamtamasyz etiledi», - dedi B. Áıtimova. Onyń aıtýynsha, konventsııanyń qabyldanýy elimizdegi múgedekterdiń joǵary bilim alýy men jumys isteýlerine, otbasyn quryp, qoǵam ómirine tolyq qatysyp, táýelsiz ómir súrýlerine jaǵdaı jasaıdy.
Depýtat sóz arasynda Elbasy «Qazaqstan-2050» strategııasynda múgedekterdi qoǵam ómirine kiriktirýge basa nazar aýdarǵanyn tilge tıek ete otyryp, Konventsııaǵa sáıkes múgedekterdi áleýmettik qorǵaýda birqatar máseleler qamtylýy tıistigin atap ótti.
«Birinshiden, «múgedekterdiń jetkilikti ómir súrý deńgeıi» týraly uǵymy anyqtalýy tıis. Ekinshiden, múgedek degen negizgi uǵymdy konventsııaǵa sáıkes keltirýge tıispiz. Memleket osy konventsııadaǵy barlyq zańnamalyq, ákimshilik jáne basqa da sharalar men quqyqtardy júzege asyrýdy óz mindetine alýy shart. Budan bólek, adamnyń adamdyq qasıetin qurmetteý, adamdy tolyq jáne tıimdi túrde qoǵamǵa kiriktirý, múgedek balalardyń damý múmkindikterin qarastyrý sekildi máseleler turǵysynda qazaqstandyq zańnamalar jetilýi tıis», - dedi senator. Onyń sózine qaraǵanda, konventsııadaǵy keıbir normalar qaazqstandyq ulttyq zańnamada qamtylmaı qalǵan.
