Múgedekter uıymdarynyń ulttyq júıesi zańdy tulǵalardyń odaǵy retinde qurylmaq
ASTANA. 25 naýryz. QazAqparat /Aınur Kenebaeva/ - Astanada Qazaqstandaǵy múgedekter uıymdarynyń ulttyq júıesin zańdy tulǵalardyń odaǵy retinde qurý máselelerine arnalǵan quryltaıshylar konferentsııasy ótip jatyr.
Ulttyq júıeniń maqsaty - aýyl, aýdan, aımaq, qalalarda jumys isteıtin orta jáne iri uıymdarǵa birikken ár túrli sanattaǵy múmkindigi shekteýli tulǵalardyń múddelerin elimizdiń barlyq ákimshilik qurylymdyq deńgeıinde qorǵaý men quqyqtaryn júzege asyrý.
Konferentsııanyń uıymdastyrylýyna «Namys» joǵary bilimi bar múgedekter qoǵamdyq birlestigi muryndyq boldy.
Múgedekter uıymdarynyń ulttyq júıesin qurý jobasyna Eýropalyq Odaq «múgedekter úshin áleýmettik qyzmetterdiń qoljetimdiligin qamtamasyz etý» jobasy aıasynda qoldaý kórsetip otyr. Atalmysh joba múmkindigi shekteýli tulǵalar úshin áleýmettik qyzmetterdiń qoljetimdiligin qamtamasyz etý men qajetti jaǵdaılardy qalyptastyrý máselesin sheshýge baǵyttalǵan.
Aıta ketelik, eki jyldyq joba 2010 jyldyń sáýir aıynan bastaý alǵan bolatyn.
«Júıe qurylǵan sátten bastap biz úkimetpen, mınıstrliktermen múgedekter quqyqtaryn qorǵaý baǵytynda jumys jasamaqpyz. Biz shaǵyn qalalar men aýyldyq shetkeri aımaqtarda turyp jatqan múgedekterdi basty nazarǵa almaqpyz, sebebi iri qalalar men oblys ortalyqtarynda turatyn múgedektermen salystyrǵanda olar qoldaý men qamqorlyqqa aıryqsha muqtaj»,- dedi «Namys» joǵary bilimi bar múgedekter qoǵamdyq birlestiginiń tóraǵasy Qaırat Imanalıev.
Qaırat Imanalıevtyń málimdeýinshe, atalmysh júıege qosylatyn uıymdarǵa arnalǵan qoldaý baǵdarlamalarynyń jobasy jasalǵan. «Mysaly, biz úıden shyqpaı-aq aqparat alýǵa bolatyn arnaıy saıttardy jasamaqpyz, ekinshiden qashyqtan oqytý baǵdarlamalaryn usynbaqpyz, úshinshiden júıe qurý arqyly qabyldanǵan jańa zańdar, olarǵa engizilgen ózgerister jóninde aqparattandyramyz», - dep naqtylady Qaırat Imanalıev.
Konferentsııa jumysyna Qazaqstannyń 14 oblysy jáne Astana, Almaty qalalarynan kelgen múmkindigi shekteýli tulǵalar birlestikteriniń, halyqaralyq uıymdar men memlekettik organ ókilderi qatysty.
