Múgedekter men qarttardyń aqshasy talan-tarajǵa salynyp jatyr - bas prokýror A.Daýylbaev
ASTANA. 7 qarasha. QazAqparat - Búginde múgedekter men qarttar úıine túsetin qarııalardy kútip-ustaýǵa bólinetin bıýdjet qarjysy talan-tarajǵa salynyp jatyr. Bul týraly búgin múgedekterdiń quqyqtaryn qorǵaý máselelerine arnalǵan alqa májilisinde QR Bas prokýrory Ashat Daýylbaev málim etti.
Onyń habarlaýynsha, ondaı oqıǵalardyń biri Ońtústik Qazaqstan oblysynda anyqtaldy. Kóksaı medıtsınalyq-áleýmettik mekemesi qarııalardyń zeınetaqy jınaq aqshalaryn eki jyl boıy jymqyryp kelgen. «Stomatologııalyq kómek» retinde urlanǵan aqshanyń jalpy kólemi 1 mln. teńgeden asty. «Oblysta barlyq psıhonevrologııalyq mekemelerde sanıtarlyq jáne órtke qarsy erejeler saqtalmaıdy», - deıdi A.Daýylbaev. Bas prokýror atap kórsetkendeı, Ekibastuz qalasynda múgedekterge tıesili gıgıenalyq zattar tórt ese az kólemde berilip kelgen. Osylaısha, bıýdjet qarjysy talan-tarajǵa salyndy.
