Múgedekter qoǵamdaryna 10 jańa Volkswagen avtokóligi syıǵa beriledi

ASTANA. 27 qyrkúıek. QazAqparat - Senbi kúni, 28 qyrkúıekte Qazaqstannyń 5 qalasyndaǵy múgedekter qoǵamdaryna «Sábı» qaıyrymdylyq qorynan 10 jańa Volkswagen avtokóligin syıǵa berý rásimi ótedi. Bul týraly qordyń baspasóz qyzmetinen habarlady.

Osylaısha, qazir bizdiń elimizdiń 20 qalasynda múmkindikteri shektelgen adamdarǵa kólik qyzmetin kórsetetin «Áleýmettik taksı» tegin qyzmeti jumys isteı bastaıdy.

Osy qyzmettiń arqasynda elimizdiń myńdaǵan adamdary qozǵalys erkindigin sezine aldy. Endi qyzmettiń telefon nómirin terseńiz boldy, sizdiń qalaǵan jerińizge arnaıy kólik jetkizip salady. Eger adam birinshi qabattan joǵary turatyn bolsa, ony «Áleýmettik taksı» jabdyqtalǵan arnaıy kótergishpen túsýge, kóterilýge kómektesedi. Osy qyzmettiń bári tegin kórsetiledi.

Osyndaı paıdaly jobany iske asyrýǵa «Sábı» qory 400 000 000 teńge jumsady.