Múgedekti belgileý protsedýrasy adamnyń jeke qatysýynsyz-aq júrgizilmek
ASTANA. KAZINFORM — Múgedekti belgileý protsedýrasy adamnyń jeke qatysýynsyz-aq júrgizilýi múmkin. Bul týraly EHÁQM Halyqty áleýmettik qorǵaý salasyndaǵy retteý jáne baqylaý komıtetiniń tóraǵasy Tólegen Ospanqulov aıtty.
— Múgedektikti belgileý tásilderin túbegeıli transformatsııalaýdy júzege asyryp jatyrmyz. Osy reformanyń basty baǵyty — medıtsınalyq-áleýmettik saraptamany syrttaı jáne proaktıvti formatta engizý. Maqsat — azamattardyń múgedektik mártebesin alý rásimin barynsha jeńildetý: ony qoljetimdi, yńǵaıly, jedel ári eń bastysy — obektıvti jáne ádil etý. Endi azamattyń mindetti túrde kózbe-kóz tekserýden ótýi talap etilmeıdi. Belgili bir dıagnozdar boıynsha bul protsedýra adamnyń jeke qatysýynsyz-aq júrgizilýi múmkin. Alaıda bul úshin medıtsınalyq uıymnan tolyq ári shynaıy medıtsınalyq aqparat tsıfrlyq formatta usynylýy tıis, — dedi ol Ortalyq kommýnıkatsııalar qyzmetindegi brıfıngte.
Onyń aıtýynsha, múgedektikti syrttaı formatty belgileýdi engizý tek tsıfrlandyrý men rásimderdi ońaılatý maqsatynda ǵana emes, sonymen qatar medıtsınalyq-áleýmettik saraptama salasynda jınaqtalǵan mynadaı júıeli máselelerdi sheshý úshin qolǵa alynyp otyr:
1. Shalǵaı jáne aýyldyq óńirlerde medıtsınalyq-áleýmettik saraptama bólimderinde kadr tapshylyǵy bar. Bul kózbe-kóz tekserýlerdi ýaqtyly júrgizýge kedergi keltiredi.
2. Medıtsınalyq-áleýmettik saraptama qyzmetiniń sarapshylaryna túsetin júkteme artyp keledi. Bul azamattar tarapynan ótinishterdiń kóbeıýine baılanysty. Sonyń saldarynan sheshim qabyldaý merzimderi uzaryp ketedi.
3. Múgedektikti belgileý kezinde bıýrokratııalyq kedergilerdi azaıtý jáne sýbektıvti faktorlardy boldyrmaý qajettiligi týyndap otyr.
— Syrttaı proaktıvti format aımaqtar arasyndaǵy júktemeni qaıta bólýge múmkindik beredi. Bul — eksterrıtorııalyq sarapshylardyń jumysy arqyly júzege asady jáne barlyq azamatqa turǵylyqty jerine qaramastan qyzmetke teń ári ashyq qoljetimdilikti qamtamasyz etedi. Reforma halyqtyń medıtsınalyq-áleýmettik saraptama qyzmetine jáne jalpy áleýmettik qorǵaý júıesine degen senimin arttyrýǵa, sybaılas jemqorlyq táýekelderin azaıtýǵa, sondaı-aq múgedektikti belgileýdiń shyn máninde klıentke baǵdarlanǵan úlgisin qalyptastyrýǵa baǵyttalǵan, — dedi Tólegen Ospanqulov.
Aıta ketelik Eńbek jáne halyqty qorǵaý mınıstrligi múgedek jandarǵa múgedektikti mezgilsiz belgileý mehanızmine qatysty túsinik bergen edi.