Múgedekti bar balalardyń ata-anasyna qosymsha demalys berý usynyldy

ASTANA. KAZINFORM – Májilis depýtaty Magerram Magerramov múgedektigi bar balalardyń ata-anasyna qosymsha demalys berý máselesin kóterdi.

Búgin Májiliste jumysshylardyń quqyqtaryn qorǵaýǵa arnalǵan zań jobasy birinshi oqylymda talqylanǵan edi.

– Qyzmetkerlerdiń quqyqtary ishinde demalý quqyǵy bar. Bul konstıtýtsııalyq quqyq. Al bizde erekshe qajettilikteri bar bala tárbıelep otyrǵan ata-analar eńbek demalysynyń basym bóligin balasynyń emine, synamalar tapsyrýǵa, ońaltý ortalyqtaryna jumsaıdy. Máselen Estonııa aıyna bir kún demalysty erekshe qajettilikteri bar balasyna arnaı alatyndaı etip beredi. Ata-ana bul 12 kúndi jyl boıy jınap ta ala alady. Osylaısha qosymsha aqy tólenetin áleýmettik demalys qarastyrylǵan. Bizdiń mınıstrlik osyndaı ómirlik jaǵdaıda qalǵan azamattarymyzǵa qoldaý kórsetý úshin osy tájirıbeni qarastyrýǵa daıyn ba?, – dep suraq qoıdy depýtat Májilis otyrysynda.

Óz jaýabynda Eńbek vıtse-mınıstri Asqarbek Ertaev bul usynysty talqylaýǵa daıyn ekenderin jetkizdi.

– Eńbek mınıstrligi bul usynysty taǵy bir ret qaraýǵa, sizdermen talqylaýǵa jáne jalpy keńinen qoǵamdyq talqylaýǵa shyǵarýǵa daıyn. Osy arqyly mundaı suranys pen qajettiliktiń bar-joǵyn anyqtaýǵa bolady. Biz bul usynystar boıynsha jumys isteýge daıynbyz, – dedi vıtse-mınıstr.

Aıta keteıik, endi bala kútiminde otyrǵan jumyssyz ákelerge eńbek ótili esepteledi.