Múgedek jasóspirimge qyzmet kórsetpegen áýe kompanııasy jazalandy

ASTANA. KAZINFORM — Bas kólik prokýratýrasy habarlaýynsha, áýe kompanııasy kámelet jasyna tolmaǵan jasóspirimge ýaqtyly qyzmet kórsetpegen.

— 2024 jyldyń 3 qarashasynda Sankt-Peterbýrg-Astana reısimen ushyp kelgen múmkindigi shekteýli kámeletke tolmaǵan jolaýshyǵa áýe kompanııasy tıisti qyzmet kórsetpegen. Uzaq kútken jolaýshynyń ákesi balany ushaqtan ózi shyǵarýǵa májbúr boldy, — delingen habarlamada.

Aqparatta aıtylǵandaı, qyzmetti ýaqtyly kórsetpeýge áýe kompanııasy qyzmetkerleriniń múgedek arbasynyń qajettigi týraly qate habarlamasy sebep bolǵan. 
Osylaısha Astana avıatsııalyq kólik prokýratýrasy erekshe qajettigi bar jolaýshy quqyǵynyń buzylǵanyn anyqtady.

— Prokýratýra aktisi boıynsha áýe kompanııasy tasymaldaý erejelerin buzǵany úshin ákimshilik jaýaptylyqqa tartyldy (Qazaqstan Respýblıkasynyń Ákimshilik quqyq buzýshylyqtar týraly kodeksiniń 571-babynyń 1-bóligi), — deıdi Bas kólik prokýratýradan.

Eske sala ketsek, byltyr Air Astana kompanııasynyń ushaǵy 12 jasar qyz bala — Zereni «Astana-Oral» reısinen qaldyryp ketkeni týraly jazǵan edik. Sot sheshimimen áýe kompanııasy balanyń ata-anasyna 5 mln teńge moraldyq ótemaqy tóleıtin boldy.