Múgedek jandarǵa jaǵdaı jasaýda kózboıaýshylyq kóp – Úkimet basshysy
ASTANA. KAZINFORM – QR Premer-mınıstri Oljas Bektenov múgedek jandar úshin jasalyp jatqan jumystardy mardymsyz dep baǵalady.
«Eń úlken problemanyń biri – múmkindigi shekteýli jandardyń nysandardy erkin júrip-turýy. Bul aıta-aıta jaýyr bolǵan máselege aınaldy. Atqarylyp jatqan jumystar mardymsyz. Múgedek jandar úshin nysandardyń qoljetimdiligi 45%-dan aspaıdy. Onyń ústine, kedergisiz orta qalyptastyrý jumystary belsendi júrip jatqan iri qalalardyń ózinde kózge kórinetindeı nátıje joq. Muny múgedekter arbasymen qozǵalatyn Erkebulan Rústemov áleýmettik jelilerde jıi kóterip, elordanyń ózinde kóptegen pandýstar men aýyspa joldardyń qozǵalýǵa múldem jaramsyz ekenin kórsetip keledi. Tipti, keıbir pandýstar men aýyspa joldardan óter kezde besik arbamen júrgen ata-analar da álekke túsip jatady», - dedi Oljas Bektenov Úkimet otyrysynda.
Úkimet basshysynyń aıtýynsha, múgedek jandarǵa arnalǵan lıftiler men kótergishter jumys istemeıdi. Sondaı-aq, bıik bordıýrler joldy kesip ótýge kedergi keltiredi.
«Qolaıly orta qalyptastyrý boıynsha istelip jatqan jumystarda kózboıaýshylyq kóp. Obektilerdi múgedektigi bar adamdardyń, qarttardyń yńǵaıyna qaraı beıimdeý jumysyn kúsheıtý qajet. Bul, ásirese áleýmettik obektilerge, dárihanalarǵa, azyq-túlik dúkenderi men saýda ortalyqtaryna qatysty. Ónerkásip jáne qurylys mınıstrligine qurylystyń sapasy men jaýapkershilikti arttyrý úshin qoldanystaǵy standarttardy qaıta qaraýdy tapsyramyn. Normalardyń saqtalýyn baqylaý qajet», - deıdi ol.
Osyǵan deıin Eńbek mınıtsri óńirlerde múgedek jandardy jumyspen qamtý deńgeıi 50%-ǵa da jetpeıtinin aıtty.
