Múgedek jandarǵa zeınetaqy men járdemaqyny birdeı alý quqyǵy berile me
ASTANA. KAZINFORM – Premer-Mınıstrdiń orynbasary Tamara Dúısenova Májilis depýtattarynyń múgedek jandarǵa bir mezgilde zeınetaqy men múgedektigi boıynsha járdemaqyny alý quqyǵyn berýge qatysty saýalyna jaýap berdi.
«Memleket tarapynan beriletin múgedektigi úshin járdemaqy jáne jasyna baılanysty zeınetaqy áleýmettik tólemderdiń túrleri sanalady jáne olar ártúrli ómirlik táýekelderge negizdelgen. Áleýmettik kodekske sáıkes múgedektigi bar adam zeınetkerlik jasqa jetken kezde oǵan járdemaqyny tóleý toqtatylyp, zeınetaqy taǵaıyndalady (eńbek ótiline, alǵan jalaqynyń mólsherine qaraı). Eger de taǵaıyndalatyn zeınetaqy buryn alǵan járdemaqydan (tıisti sanattary úshin) az bolsa, onda járdemaqynyń mólsherine deıin jetkiziledi (qosymsha aqylar arqyly). Al eger múgedektigi bar adamdar zeınetkerlik jasqa tolǵanda, zeınetaqy alýǵa negiz bolmasa (quqyǵy joq, obektıvti jaǵdaıǵa baılanysty jınaqtaýshy zeınetaqy qorynda jarnalary joq, múldem jumys istemegen) múgedektigi boıynsha alyp otyrǵan járdemaqynyń mólsheri saqtalady», - dedi vıtse-premer.
Sonymen qatar, Tamara Dúısenova olarǵa ońaltýdyń jeke baǵdarlamasy boıynsha qarastyrylǵan tehnıkalyq quraldary (kreslo-arba, protezdik buıymdar, noýtbýktar, estý apparattary, uıaly telefondar jáne t.b.) memlekettik bıýdjet qarajaty esebinen tegin jáne óteýsiz negizde turaqty paıdalanýǵa beriletindigin aıtady.
«Bul normalar halyqaralyq tájirıbege sáıkes keledi. Osyǵan oraı, bir mezgilde zeınetaqy men járdemaqyny alý bıýdjetke aıtarlyqtaı aýyrtpashylyq túsiretinin eskere otyryp, qazirgi ýaqytta atalǵan máseleni qarastyrý josparda joq ekenin habarlaımyz», - dedi ol.
Úkimet basshysynyń jaýabyna qosymsha berilgen anyqtamaǵa sáıkes, 2025 jyly járdemaqy mólsheri jalpy aýrýy boıynsha I top úshin 101 702 teńge, II top - 81 362 teńge, III top - 55 474 teńge, múgedektigi bala kezinen bolsa I top úshin 101 702 teńge, II top – 84 598 teńge, III top – 74 428 teńgeni quraıtyn bolady.
