Múgedek jandardyń jaǵdaıyn elemegenderge salynatyn aıyppul mólsheri qandaı bolmaq
ASTANA. QazAqparat - Elorda áleýmettik jáne kólik ınfraqurylymy nysandaryn múmkindigi shekteýli jandarǵa beıimdeý boıynsha tıisti jospardy júzege asyra almaǵan qalalardyń qataryna endi.
Bul týraly búgin baspasóz máslıhatynda QR Eńbek jáne halyqty áleýmettik qorǵaý vıtse-mınıstri Svetlana Jaqypova málim etti, dep habarlaıdy QazAqparat.
Atap aıtqanda, byltyr Eńbek, áleýmettik qorǵaý jáne kóshi-qon komıteti departamentteri memlekettik basqarý, densaýlyq saqtaý, mádenıet, kóliktik qyzmet kórsetý jáne taǵy basqa salalardaǵy áleýmettik jáne kólik ınfraqurylymy nysandarynyń múgedekterge qoljetimdiligi baǵytynda QR «Múgedekterdi áleýmettik qorǵaý» Zańynyń talaptaryn saqtaýǵa qatysty ishinara 83 jáne 287 jospardan tys tekseris ótkizgen.
«Tekseris sharalary nátıjesinde, 335 sýbektige anyqtalǵan kemshilikterdi joıý jóninde uıǵarym jasalyp, jalpy somasy 26,1 mln teńgege 157 ákimshilik aıyppul salyndy»,-dedi S. Jaqypova.
Naqtyraq aıtqanda, temir jol vokzaldary men stansalarda, aılaqtar men áýejaılarda arnaıy jol belgilerin ornata otyryp, múgedek jandarǵa avtokólik quraldaryn qoıatyn oryndar qarastyrý; kózi nashar kóretin, qulaǵy estimeıtin azamattarǵa qoljetimdi bolatyndaı aqparattyq ári belgi berý qurylǵylarymen jáne baılanys quraldarymen jabdyqtaý; tirek-qozǵalys júıesi buzylǵan jandarǵa qyzmet kórsetýge kerek kezekshi qolarbanyń bolýy; qolarbada otyratyn múgedekterge mamandandandyrylǵan taksofondar ornatý syndy talaptar bekitildi.
Osy oraıda vıtse-mınıstr qyzmet ıeleriniń nemese kásipkerlikpen aınalysatyn zańdy jáne jeke tulǵalardyń múgedekterdiń áleýmettik jáne kólik ınfraqurylymy nysandaryna kedergisiz ótýin qamtamasyz etpeýi aıyppul túrindegi ákimshilik jaýapkershilikke ákelip soqtyratynyn atap ótti.
«Qyzmet ıelerine salynatyn aıyppul mólsheri 50 aılyq eseptik kórsetkishti qurasa, shaǵyn kásipkerlik sýbektilerine - 120 AEK, orta kásipkerlikke - 200 AEK, iri kásipkerlik sanatyna 400 AEK bolyp eseptelgen», - dedi Svetlana Jaqypova.
