Múgedek jandardyń túıindi máselelerine arnalǵan jýrnalıstik jumystar baıqaýy jalǵasýda
ALMATY. Tamyzdyń 4-i. QazAqparat /Erbol Turymbetov/ - Qazaqstandaǵy BUU Damý baǵdarlamasy, Qazaqstan Ulttyq baspasóz klýby, Qazaqstan Jýrnalıster odaǵy men QR Eńbek jáne halyqty áleýmettik qorǵaý mınıstrliginiń «Oqshaýlanýdan teńdikke qaraı: Qazaqstanda múgedekterdiń quqyqtaryn júzege asyrý» taqyrybyna múgedekterdiń problemalaryn baıandaıtyn BAQ basylymdaryndaǵy eń úzdik jarııalanymdar men jarııalanymdar serııalaryna báıgesi júrip jatyr,
dep habarlaıdy QazAqparat.
Jýrnalıster báıgesin ótkizýge Ulybrıtanııanyń Qazaqstandaǵy jáne Qyrǵyzstandaǵy Elshiligi qoldaý bildirýde. Konkýrstyń maqsaty múmkindigi shekteýli jandarǵa qoǵam nazaryn aýdartý. Sonymen birge, Múgedek jandardyń quqyqtary týraly konventsııany ratıfıkatsııalaýǵa QR-nyń daıyndyq jumystaryn qoldaýdy da kózdeıdi.
Baıqaýǵa kez kelgen menshik nysanyndaǵy nemese merzimdi baspasóz betterinde jarııalanǵan qazaq jáne orys tilderindegi jýrnalıstik jumystar qatysa alady. Qos tildegi konkýrs qorytyndysy 15-shi qazanda shyǵady. Jeńimpazdar úshin:
1-shi orynǵa 150 myń teńge;
2-shi orynǵa 90 myń teńge;
3-shi orynǵa 60 myń teńge kóleminde syıaqy taǵaıyndalǵan.
Osy jyldyń sáýirinde bastalǵan baıqaý qyrkúıek aıyna deıin jalǵasady dep josparlanǵan.
