Múgedek jandardyń nysandar men qyzmetterge qoljetimdiligin qamtý úshin 10 mlrd-qa jýyq teńge bólinedi - T. Dúısenova

ASTANA. QazAqparat - Múmkindigi shekteýli jandar úshin nysandar men qyzmetterge qoljetimdilikti qamtamasyz etý maqsatyndaǵy sharalarǵa 2015-2018 jyldar aralyǵynda 9 mlrd 998,7 mln. teńge bólinedi. Bul týraly Densaýlyq saqtaý jáne áleýmettik damý mınıstri Tamara Dúısenova búgin Májilistiń jalpy otyrysynda málim etti.

Májiliste «Qazaqstan Respýblıkasynyń keıbir zańnamalyq aktilerine múgedekterdiń quqyqtaryn qorǵaý máseleleri boıynsha ózgerister men tolyqtyrýlar engizý týraly» Zań jobasy birinshi oqylymda maquldanǵan bolatyn.

«Bıýdjetten qarastyrylyp otyrǵan qarajat eń birinshi kezekte múmkindigi shekteýli jandarǵa gıgıenalyq-tehnıkalyq quraldar usyný men qyzmetter kórsetý standarttaryn jaqsartýǵa baǵyttalady. Bizde bul standarttar sany múldem tómen bolatyn jáne soǵan oraı qoǵamdyq birlestikter tarapynan osy baǵytta kóptegen ótinishter tústi. Sonymen qatar, biz buǵan deıin olarǵa aılyq qamtamasyz etý sharalaryn usynyp kelgen bolatynbyz, endi bul jyldyq qamtamasyz etýge almastyrylady», - dedi Tamara Dúısenova.

Mınıstrdiń aıtýynsha, aldaǵy ýaqytta elimizdegi kohlearly ımplantant alǵan balalardyń estý-sóıleý protsessoryn aýystyrý úshin 1,5 mlrd teńge jumsalady.

«Tutastaı alǵanda, zań jobasyn qabyldaý Qazaqstandaǵy 600 myńnan astam múmkindigi shektelgen azamattardyń jaǵdaıyn, quqyqtaryn jasartýdy qamtamasyz etetini sózsiz. Múgedekterdi áleýmettik qoldaýdy odan ári jetildirý Elbasynyń Qazaqstandy damyǵan 30 eldiń qataryna enýi jaǵdaıynda jalpy áleýmettik ekonomıka standarttaryn engizý týraly tapsyrmasyn iske asyrýǵa múmkindik beredi», - dedi T. Dúısenova.