Múgedek jandardyń densaýlyǵyn saqtaý salasynda túıindi máseleler kóp
ASTANA. 8 qarasha. QazAqparat - Qazaqstanda múmkindigi shekteýli jandardyń densaýlyǵyn saqtaý salasynda qordalanyp qalǵan problemalar barshylyq.
Búgin «Múgedek áıelderdiń densaýlyǵyn qorǵaý: tájirıbe, problemalar jáne sheshý joldary» taqyrybyndaǵy «dóńgelek ústelde» QR Prezıdenti janyndaǵy Áıelder isteri jáne otbasy-demografııalyq saıasat jónindegi ulttyq komıssııanyń bas sarapshysy Gaýhar Nurahmetova osy máseleni kóterdi.
Onyń habarlaýynsha, qazirgi kezde múgedekterdi medıtsınalyq-áleýmettik jaǵynan qoldaý júıesin jetildirý negizgi máselelerdiń biri bolyp sanalady. «Ásirese, reprodýktıvti densaýlyq boıynsha túsindirý jumystaryn keńinen júrgizý qajet. Múmkindigi shekteýli azamattardyń basym bóligi onyń mán-mańyzyn durys túsinbeı jatady. Sondyqtan múgedek azamattarǵa medıtsınalyq kómektiń alǵashqy qyzmeti kezinde jeke-dara jumys isteýdiń mańyzy zor dep oılaımyn», - deıdi G.Nurahmetova. Budan basqa, elimizde emdeý-eńbek etý sheberhanalarynyń júıesi qalyptaspaǵan. Múgedek jandardyń kóbisi jumysqa tura almaı júredi. Sol sebepti osy sanattaǵy Qazaqstan azamattarynyń qoǵamǵa tolyqqandy yqpaldasýyn barynsha qamtamasyz etý qajet.
Aıta ketken jón, búginde Qazaqstanda 570 myńnan astam múgedek jan tirkelgen. Olardyń úshten bir bóliginiń jumys isteýge qabileti bar.
