Múgedek qyzyn 30 jyl baǵyp otyrǵan ana Saparbaevtan kómek surady
AQTÓBE. QazAqparat - Aqtóbe qalasynyń turǵyny Sánimgúl Nysanalına júıke júıesi aýrýyna shaldyqqan qyzyn 30 jyldan astam ýaqyt jalǵyz baǵyp keledi. Búgin ótken halyqpen kezdesýde ol oblys ákiminen kómek surady, dep habarlaıdy QazAqparat tilshisi.
Sánimgúl Nysanalınanyń qyzy ІІ top múgedegi. Ol júıke júıesi aýrýyna shaldyqqan. Búgin ana arnaıy mekteptiń qajettigin aıtyp, ótinish bildirdi. Sebebi qyzy mektep oqymaǵan, únemi janynda júredi.
«Múgedek qyzymnyń kútimimen úıde otyrmyn. Ózim jumys istemeımin. Qazir qyzymnyń zeınetaqysymen jan baǵyp júrmin. Ótinishim bar. Óz erkimen júrip-turatyn balalarǵa arnaıy mektep kerek. Qyzym maǵan, men qyzyma qarap otyramyz»,- dedi Sánimgúl Nysanalına.
Aqtóbe qalasynda múgedek balalarǵa arnalǵan, aýtızm dertine shaldyqqan balalardy emdeıtin ortalyqtar salynady. Bıznestiń áleýmettik jaýapkershiligi men memlekettik-jekeshelik seriktestik aıasynda salynatyn ortalyqtar balalardyń ýaqytyn tıimdi ótkizýge arnalǵan.
«Múmkindigi shekteýli balalarǵa baılanysty jumys júrip jatyr. Hromtaýdaǵy mys kompanııasymen birge múgedek balalarǵa arnalǵan ońaltý ortalyǵyn salamyz. Aldaǵy ýaqytta memlekettik-jekeshelik seriktestikti ári qaraı damytyp, «Týǵan jerge taǵzym» aktsııasyn jalǵastyramyz. Bizde kásipker kóp. Keıbiri jaqsy kómek kórsetedi, keıbiri eshteńe istemeıdi. Olar kimniń, neniń arqasynda kásipker bolǵanyn umytyp ketedi. Bıznestiń áleýmettik jaýapkershiligi degen bar. Sondyqtan barlyq kásipkerdi aktsııa aıasynda jumys isteýge shaqyramyn»,- dedi Aqtóbe oblysynyń ákimi Berdibek Saparbaev.
