Múgedek qyzdyń zorlanýyna qatysty shaǵym: Mınıstrlik Shymkenttiń áleýmettik ortalyǵyn tekseredi

NUR-SULTAN. QazAqparat – QR Eńbek jáne halyqty áleýmettik qorǵaý mınıstrligi Shykenttegi áleýmettik ortalyqta І toptaǵy múgedek qyzynyń zorlanyp kelgenin aıtqan ananyń shaǵymynan keıin atalmysh mekemege jospardan tys tekseris jasaıdy, dep habarlaıdy QazAqparat.

«QR Eńbek jáne halyqty áleýmettik qorǵaý mınıstrliginiń bastamasymen Shymkent qalasy ákimdiginiń «№2 arnaýly áleýmettik qyzmet kórsetý ortalyǵy» KMM-de arnaýly áleýmettik qyzmetterdiń sapasyn tekserý maqsatynda monıtorıngilik top qurylady.

Monıtorıngilik toptyń quramyna beıindi memlekettik jáne jergilikti atqarýshy organdardyń, qoǵamdyq birlestikterdiń jáne ózgelerdiń ókilderi kiredi.

Komıssııa qamqorlyqqa alynǵandarǵa qatysty turý, tamaqtaný, tósek-oryn jabdyqtarymen, kıimmen jáne mindetti gıgıenalyq quraldarmen qamtamasyz etilý jónindegi standarttardyń saqtalýyn, sondaı-aq kórsetiletin áleýmettik-medıtsınalyq qyzmetterdiń sapasyn tekseredi.

Shymkent qalasynyń turǵyny Álııa Mamýtovanyń Instagram-pablıgindegi úndeýhaty tekserý júrgizýge negiz boldy. Áıel І toptaǵy múgedek qyzy mekemede 7 jyl boıy zorlanǵanyn habarlady. Onyń aıtýynsha, qyzy esinen tanyp qalǵan kezde ony paıdalanǵan, qyz epılepsııadan zardap shegedi», - delingen Eńbek mınıstrliginiń aqparatynda.

Aıta keteıik, qazirgi ýaqytta atalǵan fakti boıynsha QR QK-niń «Birneshe ret jasalǵan zorlaý» baby boıynsha sotqa deıingi tergeý jumystary júrgizilýde.

Vedomstvodan málim etkendeı, tekserý nátıjeleri týraly qosymsha habarlanatyn bolady.