Múgedek balasyna qaraǵan jyldary ananyń eńbek ótili esepke alynady - T. Dúısenova

ASTANA. QazAqparat - Múgedek balasyna qaraǵan jyldary ananyń eńbek ótili esepke alynady. Búgin Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine zeınetaqymen qamsyzdandyrý máseleleri boıynsha ózgerister men tolyqtyrýlar engizý týraly» zań jobasyn talqylaý barysynda Densaýlyq saqtaý jáne áleýmettik damý mınıstri Tamara Dúısenova osylaı málim etti.

Mınıstrdiń sózine qaraǵanda, qazirgi kúni múgedek bolyp dúnıege kelgen balasy 18 jasqa kelgenge deıin onyń anasy járdemaqy alady. Bala 18 jasqa tolǵan soń anaǵa járdemaqy berý toqtatylatyn. Al, anasynyń balasyna qaraǵan jyldary eńbek ótili retinde sanalmaı kelgen edi.

«ıAǵnı, ondaı ana jalaqy almaǵany óz aldyna, qanshama jyl jumyssyz otyrǵandyqtan zeınetaqysy da mardymsyz bolatyn, tipti bundaıda zeınetaqy taǵaıyndalmaıtyn jaǵdaılar da kezdesedi. Endigi kúni búgin talqylanyp otyrǵan zań jobasyna sáıkes, múgedek balasyna qaraǵan jyldary anasynyń eńbek ótilin esepteý týraly ózgeris engizý kózdelip otyr. Osylaısha, múgedek balalarǵa qarap otyrǵan analardyń sol ketken ýaqyty eńbek ótiline kirgiziletin boldy. ıAǵnı, ananyń jalaqysynan zeınetaqy qoryna aqsha bólinip otyrady»,-dedi mınıstr Tamara Dúısenova.

Onyń sózine qaraǵanda, múgedek balasy bar anaǵa 16 jasqa deıin járdemaqy tólenedi. Al 16 jastan keıin anasy ne bolmasa ákesi múgedek balaǵa qarap otyratyn bolsa, olarǵa áleýmettik qyzmetker retinde ortasha jalaqy qamtamasyz etilip otyr.

Eske sala keteıik, atalǵan zań jobasyn Májilis depýtattary búgingi jalpy otyrysta birinshi oqylymda maquldady.