Múgedek balasy bar jalǵyzbasty ana: Biz sekildilerdiń kóbi nesıeni májbúrli túrde alǵandar
QARAǴANDY. QazAqparat - Prezıdent Qasym-Jomart Toqaevtyń keshegi jarlyǵy kóptegen adamǵa qýanysh syılady dep úmittenemin. Óıtkeni, biz sekildilerdiń kóbi nesıeni májbúrli túrde alǵandar. QR Prezıdentiniń Jarlyǵyna qatysty pikir bildirgen múgedek bala asyrap otyrǵan jalǵyzbasty ana, qaraǵandylyq Janar Maratqyzy osylaı aıtty, dep habarlaıdy QazAqparat.
«Men múgedek bala asyrap otyrǵan jalǵyz basty anamyn. Balam Dıastyń jasy qazir on altyda. Balalar tserebraldi sal aýrýymen bala kezinen aýyrady. Memleket beretin járdemaqymen kún kórip otyrmyz. Páter jaldap turamyz. Aı saıyn kommýnaldyq tólem, páter aqysyn tólegen soń, qalǵan aqsha balamnyń dári-dármegine, kıim-keshegi men basqa da qajettilikterine jetpeıdi. Sondyqtan keıde paıyzy úlken bolsa da, bankten nesıe alýǵa májbúr bolamyz. Qanshama otbasy nesıelerin tóleı almaı qınalyp júrgenderin bilemin. Prezıdenttiń bul jarlyǵy osyndaı qınalyp júrgen otbasylarǵa qýanysh syılady dep oılaımyn. Ol da bolsa úlken kómek», deıdi Janar Maratqyzy.
Ol óziniń on jyldan astam ýaqyt boıy páter kezeginde turǵanyn aıtady. «Alaıda ony da alý úshin bastapqy jarna qajet. Jańa aıtyp ótkenimdeı, bizde ondaı múmkindik joq. Nege múgedek bala asyrap otyrǵan analarǵa bastapqy jarnasyz páter berilmeıdi nemese qandaı da bir jeńildik jasalmaıdy? Endi jańa Prezıdentimiz osy jaǵyn da qarastyrsa deımin»,- dep óz ótinishin jetkizdi Janar Maratqyzy.
